E polítiko derechista franses, Rachida Dati, na momentu di yega korte na Paris pa atendé e akusashon di korupshon kontra di su persona. Ta akus’é ku durante e periodo di òktober 2009 pa febrüari 2013 el a lòbi na interes di Renault-Nissan den Parlamento Europeo.
PARIS,Fransia (AFP).- Ministerio públiko franses enkargá ku asuntunan finansiero a demandá kuater aña di prizòn pa e èks-minister Rachiete Dati, husgá pa korupshon. Dos dje añanan lo ta bou di vigilansia elektróniko. Mas aleu e demanda ta inkluí un periodo di 5 aña ku e no por ehersé trabounan públiko i tampoko traha komo abogado. Tambe a solisitá ehekushon provishonal di eventual kastigu, ku otro palabra ku ta apliká e kastigu dirèkt despues di kondena, inkluso si Dati disidí na apelá.
Den kaso ku e tribunal sigui e demanda ora ku dikta sentensia, Dati di forma inmediato lo pèrdè su trabou komo alkalde di e VII distrito di Paris.
E èks-minister i abogado di 60 aña ta keda akusá di korupshon pa motibu di su relashonnan ku Carlos Ghosn, e èks-gerente máksimo di Renault-Nissan, kende a hui pa hustisia i a refugiá na Líbano. El a keda husgá den ousensia.
Segun e akusashon, Dati a kobra 900.000 euro komo abogado di un filial di Renault-Nissan na Hulanda siendo ku en realidat tabata pago pa su trabou di defensa di interesnan dje grupo outomobilístiko den Parlamento Europeo, algu ku tabata prohibí pa motibu di su kondishon komo eurodiputado. Den e kaso di Ghosn, e demanda ta di kuater aña di prizòn i a mantené e òrdu di detenshon.
Dati, na un manera firme, ta nenga e akusashonnan i ta sigurá di no a hasi nada otro sino di a traha komo abogado pa e aliansa Renault-Nissan, un aktividat ku legalmente ta kompatibel ku su mandato elektoral. Pero, segun e fiskal Julien Augereau, di e trabou ku el a hasi pa un empresa ku tabatin 200 persona den su departamento hurídiko, “no tin praktikamente ningun indikashon ku ta kontribuí pa por haña un bista di e trabounan ku kua el a kumpli”. Segun fiskal, “no tin nótulo, no tin pòst i ningun informe ni konvokashon di reunion”.
E èks-minister despues di mas ku dies aña ta keda husgá den e kaso aki.
