Eks-presidente franses Nicolas Sarkozy (meimei) ta bandoná sala di korte despues di a skucha akusashonnan di finansiamentu ilegal di su kampaña den 2007 ku sèn risibí for di Libia.
PARIS, Fransia (AFP).- Ministerio públiko franses ayera a presentá demanda di shete aña di prizòn kontra di e eks-presidente konservador Nicolas Sarkozy, pa supuestamente a finansiá su kampaña elektoral di 2007 ku plaka risibí ilegalmente di Libia.
Tambe a demandá 300.000 euro di multa kontra di su kasá, e kantante, modelo i aktris Carla Bruni.
Kontra di su eks ministernan Claude Guéant i Brice Horteflux a demandá kastigu di prizòn di seis i tres aña, respektivamente, ademas di un multa, pa a yuda sera un pakto di korupshon ku e diktador libio Muamar Gadafi.
E fiskalnan a deskribí e eks presidente (entre 2007 i 2012) komo “e berdadero responsabel pa a sera un pakto di korupshon ku Gadafi pa finansiá su kampaña”. Tambe a referí na “kontra pago” diplomátiko, hurídiko i ekonómiko primintí na e régimen libio.
Pa e fiskalnan, tur e akusashonnan ku a keda menshoná dia 6 di yanüari a keda proba, esta korupshon, enkubrimentu di malversashon di fondonan públiko, finansiamentu ilegal di kampaña i asosiashon pa kometé delito.
“Solamente kastigu di prizòn i un multa fuerte, ademas di priv’é di sierto derechinan sivil, lo por protehá sosiedat di un akusado ku a mustra un ambishon polítiko devorador’, segun e fiskal Sebastien de la Touanne.
E eks-presidente, ku ta defendé su inosensia for di kuminsamentu dje kaso i kende su defensa lo presentá nan puntonan final dia 8 di aprel, ya a keda kondená den un otro kaso na un aña di prizòn pa korupshon, sentensia ku e ta kumpli na kas ku banchi elektróniko na ènkel.
