E ta insistí ku e no sa di nada

WILLEMSTAD.- E konosido rèper Marvielten “Jetten” Zink (22), ayera mester a presentá dilanti hues, pa un kaso di intento di asesinato i maltrato di arma ku e ta keda akusá di dje. Ta trata di e kaso ku a haña e nòmber ‘Friday’s’.

Segun e akusashon, dia 28 di febrüari 2021, e akusado a tira dirigí riba e hòmber R. Martinus,  ora ku e tabata kumprando kuminda na e trùk di pan “Friday’s” riba Caracasbaaiweg.

E víktima a haña bala na altura di su pòls i mester a bai poli riba su mes. Despues el a bai polis i a hasi un denunsia. El a deklará ku e dia ei, el a yega na e trùk i a baha fo’i outo, pa bai kumpra kuminda. Ora ku e tabata pidiendo su kuminda, el a sinti un wanta riba su kabes. Ora ku el a drai wak, el a mira 4 hòmber deskonosí pe di kual 1 a saka un arma i kuminsá lòs tiru riba dje. Di spantu el a kuminsá kore i segun e ta kore, el a tende mas bala ta kai ku konsekuensia ku un a alkans’é na su pòls. El a bai poli, kaminda dòkter mester a saka un bala fo’i su man. Na e sitio polisnan a konfiská 11 huls.

Segun Martinus, e no tin enemigu i no sa dikon nan a tira riba dje. P’esei di miedu, el a disidí di bai bèk Hulanda. Durante tratamentu di e kaso, Ministerio Públiko a laga pasa un grabashon, di loke a sosodé e dia enkuestion. Tabata un polis ku tabata para na e sitio, a filma tur loke e tuma lugá. Despues di e akto, por a mira e hòmber subi un “quad” ku kolónan yamativo bèrdè i hel i kore bai.

Durante ku e tabata bayendo, el a bolbe lòs algun tiru den laira. Dia 4 di mart a drenta un yamada anónimo na polis, ku a bisa ku esun ku a tira riba Martinus, yama Jetten. Despues ku polis a wak e imágennan, nan a bisa di a rekonosé e hòmber riba e imágennan, komo e rèper Jetten. Despues ku polisnan a detené e akusado, nan a wak den su telefòn i a mira via e sistema di ‘zendmast” ku e tabata na e sitio, momento di e tiroteo e dia ei.  Polis a haña hopi potrèt di arma, lachi bala i e akusado  bistí ku un paña di kamuflahe banda di un mucha muhé ku arma den su man. Na polis e akusado a bisa ku ta trata di un arma di “airsoft”.

Tambe nan a mira foto di e “quad” ku  ta parse esun ku e sospechoso di e tiroteo, a kore bai kuné riba e imágennan i tambe e mesun t-shirt. Tambe polis a haña  un mensahe den telefòn di e akusado, kaminda e ta bisa un amigu, pa e warda e “quad”, pasó e tin miedu ku e hendenan blou lora na kas di su tata.

E akusado a puntra hues si ora e mira video, si e ta rekonosé. Segun e akusado, e no ta komprondé dikon nan ta keda kuné tené, pa algu ku e no a hasi. El a bisa ku e no konosé e persona ku ta akus’é i dikon e hende no tei presente, pa bisa ku ta e a tir’é. E no sa ki problema tabatin, pero e no tin nada di aber.

Segun e akusado, el a fia e “quad” i dor ku e ta un artista, e por fia loke e ke i saka potrèt kuantu ku e ke, pa traha e video clip. El a bisa su amigu di e hendenan na blou bèrdat, pero e amigu su apodo ta “hendenan blou” i e tabata kiermen ku su amigu ku e “quad” mester bai kaminda e tabatin ku bai.

Hues a bisa ku den pasado el a wòrdu kondená pa atrako. Fiskal a bisa ku e ta apsolvé e akusado di intento di asesinato pero ta kulp’é pa intento di homisidio.  Mirando esaki fiskal ta demand’é na 8 aña di kastigu. Aki 3 siman korte lo dikta sentensia.

 

LAGA UN KOMENTARIO

Please enter your comment!
Please enter your name here