Dramatisashon dje masakre di mart 1960 ku a konosé kasi shen víktima fatal despues ku polis dje gobièrnu di apartheid surafrikano a tira kontra di hendenan di koló kendenan tabata manifestá.
SHARPEVILLE, Suráfrika (AFP).- Abogadonan di sobrebibientenan i famianan di víktimanan dje “masakre di Sharpeville”, ku a trese na kla e brutalidat di e apartheid surafrikano, a kuminsá ku akshonnan legal kontra di estado. Esaki pa motibu di un lei ku ta blòkia demandanan di kompensashon.
Dia 21 di mart 1960, polis surafrikano a tira riba personanan ku tabata protestá dilanti di un warda di polis de e siudat di Sharpeville, ku un saldo ofisial di 69 morto i sigur 180 hende heridá.
Pero investigashonnan mas aleu sitá pa abogadonan a konkluí ku por lo ménos 91 persona a muri i mas ku 238 a keda leshoná.
Awor abogadonan di e sobrebibientenan i famianan dje víktimanan ta eksigí pa gobièrnu anulá un lei ku ta datá di 1961, kual ta prohibí kompensashonnan òf e prosesamentu di esnan responsabel.
Abram Mokofeng tabatin 20 aña i a sobrebibí e matansa. E dia ei el a keda alkansá pa dos bala, unu na pia i unu den lomba, di kua e último semper a keda den su kurpa. Huntu ku su yu muhé i dos ñetu, Mokfeing kende awor tin 87 aña, a relatá ku e tempu ei nan a prosesá kontra di un lei ku tabata obliga surafrikanonan di koló pa kana tur momento ku un pèrmit pa nan por move riba kaya.
Charne Tracey, dje grupo Lawyers for Human Rights, a splika ku “e demandantenan ke start un diálogo ku gobièrnu pa diskutí ria reparashonnan apropiá”.
Pa Mpabi Chabane (39) e akshon tambe tin di haber ku e pèrdida di sernan kerí. Su wela tabata entre esnan ku a muri.
“Ta un kos realmente tristu”, el a bisa. “Nan a kita nos wela for di nos. Mi mama tabatin apénas 4 aña ora ku nan a mata su mama”.
Despues dje final ofisial di apartheid ku e promé elekshonnan den 1994, e dia dje masakre a keda deklará komo Dia di Derechinan Humano.
