Strobando siudadano kana pa ehersisio

WILLEMSTAD.- Hopi siudadano tin kanamentu komo parti di nan ehersisio físiko i ta hasi esaki na entre otro ‘koredó’ i áreanan manera Maripampoen etcetera, pero aktualmente no por kana mas den e áreanan ku nan a kustumbrá, pa motibu di medidanan di “lock down” i gobièrnu ta promové pa e hendenan kana den nan bario.

Pero esaki ta kasi imposibel den hopi bario aki na Kòrsou, mirando kuantu kachó ta kana lòs den barionan. Hopi hende ta obligá di kana ku un palu den man pa defendé nan mes ora ku nan keda ataká.

Por tuma nota asta di hendenan ku ta keda krusa kaya ora ku nan mira grupo di kachó riba distansia riba e banda ku nan ta kana, ku tur e konsekuensia ku esaki por trese kuné.

P’esei siudadanonan ku ta kana pa ehersisio ta roga gobièrnu pa buska un solushon pa e situashon fèrfelu aki, mas pronto posibel. Tin asta gritu pa piki e kachónan aki i likidá nan mesora, pero e último aki sigur no ta e forma pa atendé ku animal. Ounke ku tin un akuerdo resien firmá entre di Turismo di Kòrsou (CTB) i Stichting Dierenbescherming Curaçao pa yega na solushon pa e kachónan ku ta kana lòs riba aya, komunidat ta pidi pa un solushon agudo, mirando ku e akuerdo firmá lo tuma tempu promé ku esaki yega dje leu ei.

Luna pasá Ofisina di Turismo di Kòrsou (CTB) i Stichting Dierenbescherming Curaçao a firma un akuerdo di koperashon pa atendé e problemátika di kachó ku ta kana lòs riba kaya. Kòrsou tin hopi aña ta konfrontá e situashon aki tantu den barionan pero tambe den Sentro di Siudat i den áreanan turístiko.

E akuerdo aki ta bin despues di un investigashon hasí na aña 2016 ku ta konkluí ku Kòrsou tin un total di 6000 kachó ku ta kana lòs riba kaya. Konsiderando bienestar di animalnan i e bista negativo ku kachónan ku ta kana lòs riba kaya ta duna sigur for di e punto di bista turístiko ta importante pa kuminsá tuma akshon. Esaki ta motibu ku Ministerio di Desaroyo Ekonómiko a pone e fondonan disponibel pa ehekushon di e akuerdo di koperashon entre CTB i Stichting Dierenbescherming Curaçao.

Mester indiká ku den e “lock down” aki no solamente pa e aspekto turístiko ta importante pa kita kachónan for di riba kaya, pero tambe pa siudadanonan lokal ku ta obligá pa kana den nan bario pa ehersisio. Tin hopi hende ku mester kana tur dia un tiki pa nan salú, manera por ehèmpel problema ku kurason etcetera.

E akuerdo ariba menshoná a keda firmá pa un periodo di 1 aña i ta enserá sosten finansiero na Stichting Dierenbescherming Curaçao pa primeramente traha un asilo pa akapará e kachónan ku keda kitá for di riba kaya. E tereno pa por traha e asilo riba dje ta keda poné na disposishon di Stichting Dierenbescherming Curaçao konforme un akuerdo di maneho ku a keda firmá ku Domeinbeheer. Tambe, Stichting Dierenbescherming Curaçao ta responsabel pa  kuido di e kachónan ku keda kitá for di riba kaya i tambe sterilisashon di e kachónan aki.

Lo bin ku un kampaña di konsientisashon ku énfasis riba sterilisashon di kachó i ta konta ku komunidat su koperashon pa huntu resolvé e problemátika di kachónan ku ta kana lòs riba kaya.

 

LAGA UN KOMENTARIO

Please enter your comment!
Please enter your name here