WASHINGTON, AP.- E representantenan demókratanan a pidi Kas Blanku i funshonarionan di gobièrnu pa proveé e dokumentonan interno tokante e deliberashonnan di Donald Trump su atministrashon tokante e proposishon pa manda migrantenan detené pa “siudatnan santuario”, di kual mayoria ta demókrata.

E karta a representá e kontesta formal di e demókratanan. Outoridat di e siudatnan santuario ta limitá nan koperashon ku outoridat federal, i asina purba deportá inmigrantenan ilegalmente den e pais.

E proposishon a wòrdu rechasá dos biaha pa funshonarionan di gobièrnu, pero Trump a defendé esaki.

“Merka tin e derechi legal apsoluto pa transferí inmigrantenan ilegal detené pa Siudatnan Santuario”, asina Trump a bisa djasabra riba Twitter. Trump ta poniendo preshon pa hasi e leinan di inmigrashon mas severo.

E karta ta pidi tur dokumento pertinente desde 1e novèmber 2018 te djaluna. E demókratanan kier esaki pa 3 di mei.

E karta a wòrdu mandá pa e hefe di komishon hudisial di Kámara di Representante, Jerry Nadler, e hefe di komishon di supervishon i reforma di e gobièrnu Elijah Cummings, ku e hefe di komishon di seguridat nashonal Bennie Thompson. E karta a wòrdu dirigí na Mick Mulvaney, e hefe di despacho den Kas Blanku, i Kevin McAleenan, e sekretario interino di Departamento di Seguridat Nashonal.

LAGA UN KOMENTARIO

Please enter your comment!
Please enter your name here