WASHINGTON, AP.- E presidente di Kámara di Representante, demókrata Nancy Pelosi a indiká ku lo investigá deklarashonnan di impuesto, negoshi i lasonan di Trump ku Rusia.
E hefe di Komishon di Inteligensia di kámara, demókrata Adam Schiff, a anunsiá ku lo tin un investigashon amplio pa e interferensia ruso den elekshon di 2016 i di e interesnan finansiero di Trump den estranhero.
Trump a presentá un ultimatum kontra Kongreso den su diskurso di Estado di Union, pero e demókratanan ta parse manera mas determiná pa investigá gobièrnu.
“Presidente no mester menasá Kámara di Representante”, asina Pelosi a bisa na reporteronan, kritikando Trump pa bisa ku “e investigashon ridíkulo i partidista” mester terminá awor pasó e por kousa daño na ekonomia.
Pelosi a bisa ku Kongreso tin e responsabilidat di supervisá, i ku e lo ta negligente si Kongreso no hasi esaki.
E pènel di inteligensia di kámara di representante a vota djárason na fabor di manda e transkripshonnan di su investigashon anterior tokante e interferensia ruso na fiskal spesial Robert Mueller. E republikanonan a terminá e investigashon den mart, bisando ku no tin prueba di konspirashon ni interferensia entre Rusia i e kampaña di Trump. E demókratanan a ninga indikando ku e desishon aki ta demasiado prematuro.
