Erick Trump i Donald Trump Jr. hasiendo e famia aun mas riku. Awor ku akusashon ku presidente Donald Trump a hinka nan den delegashon ku a bai hasi sierto negosiashon na China.
WASHINGTON (AFP).- Oposishon demokrat ayera a akusá presidente merikano, Donald Trump, di korupshon despues di revelashon di operashonnan importante den merkado di bùrs realisá na su nòmber, ounke su yu ta nenga ku tabatin iregularidat. “E korupshon dje presidente ta un desaster pa seguridat nashonal”, segun e senador demokrat Elizabeth Warren riba X. Warren a referí na e kompra di akshonnan di NVIDIA, fabrikante avansá di ‘chips’ usá den empresanan di inteligensia artifisial.
Trump a permití pa e bende e produktonan na China, generando un oumento temporal di preis di su akshonnan. “Trump a hiba e direktor ehekutivo di NVIDIA den su biahe pa China pa preshoná (e presidente chines) Xi Jinping pa kumpra ‘chips’ avansá di IA, apesar ku esei lo krea un menasa pa seguridat nashonal di Merka”, segun Warren.
“Ta resultá ku Trump tambe a kumpra miónes den akshonnan di NVIDIA”, el a agregá. E yu mayor di presidente, Erick Trump, kende ta dirigí e negoshi familiar huntu ku su ruman Donald Trump Jr., a nenga di a kometé iregularidatnan. “Tur nos akshonnan ta invertí den un kompania siegu pa institushonnan finansiero mas grandi. Bisando ku nos ta kumprando i bendiendo akshonnan individual, desakreditando miembro di famia Trump, ta un mentira i algu kompletamente falsu”, segun Eric Trump a skirbi riba X.
E yu mas grandi di Trump no ta okupá un funshon ofisial den gobièrnu merikano. Pero asina mes el a kompañá Donald Trump riba su biaha pa China. E direktor ehekutivo di NVIDIA, Jensen Huang, tambe a biaha ku e presidente.
E gobernador demokrat di Illlinois, JB Pritzker, a kalifiká Trump komo “e presidente mas korupto den historia di Merka”, segun el a pone riba X.
Despues di su regreso na poder, Trump a entregá su negoshinan na su yunan, ku ménos restrikshon ku den su promé mandato. E propio presidente ta disidí e límitenan, organisando aktonan diplomátiko den nan residensianan privá.
Dokumentonan publiká djaweps na nòmber di Trump ta detayá transakshonnan ku a superá 200 mion dòler i a envolví empresanan manera Amazon, Apple, Microsoft i Boeing. E revista Forbes a kalkulá ku e fortuna personal di e presidente ta di 6.500 mion dòler den mart di 2026, un oumento di 1.400 mion den último aña.
