presidente di Partido Demokrat.
WASHINGTON (AFP).- Partido Demokrat a anunsiá di lo krea un “sala di guera” pa reakshoná ora tin mester riba e “mentiranan” ku ta atribuí na e presidente Donald Trump. E demokratnan tabata ketu for di despues ku a pèrdè White House kontra dje magnate republikano i tur dos kámara di Kongreso den novèmber.
“Ademas ku Donald Trump a sigui apliká su politiká pa subi preis, distruí empleonan i ruina bidanan, tambe e ta sigui gaña”, segun e presidente nobo dje partido, Ken Martin.
Demokratnan ta dòbel nan ”esfuersonan pa sòru pa merikanonan sa dje echonan real ku informashon presis riba e impakto dje polítika aktual”, segun el a agregá.
Pa e motibu ei, e partido lo krea “un sala di guera” enkargá pa tur dia saka un “mensahe klave”, ku personanan influyente i nan boseronan tradishonal lo transmití riba retnan sosial”.
Den un entrevista ku e korant Washington Post, Martin a rekonosé ku Partido Republikano di Trump tabata mas rápido pa komprendé ku e mayoria di norteamerikanonan ta informá nan mes mediante nan telefòn mobil.
“Durante di tres aña i mei nan a dediká nan mes pa ataká (èks presidente) Joe Biden i e demokratnan sin ku nan tabata haña resistensia”, segun el a lamentá. “Nan a duna nos un etikèt promé ku nos tabatin tempu pa definí nos mes”.
E demokratnan tambe a oumentá nan vigilansia di e medionan “pa garantisá ku kualke mentira bisá den diskursonan, entrevista- òf publikashonnan riba retonan sosial di parti di Trump òf su aliadonan, ta keda kontra arestá na tempu”, segun e komunikado.
E partido tin intenshon pa aserká nan mes na prensa yegá na e gobièrnu di Trump, manera ta e kaso ku e kadena di televishon Fox News.
