Den bida ta importante pa no lubidá e kosnan simpel

Samiah Booi Miss International Curaçao 2026 riba kaminda pa Tokyo Hapon; Nan ta duna alegria, trankilidat i pas

Miss International Curaçao ta orguyoso di anunsiá e koronashon di Samiah Booi komo Miss International Curaçao 2026. Samiah lo tin e honor di representá Curaçao na e prestigioso kompetensia Miss International, ku lo tuma lugá den luna di novèmber aki na Tokyo, Hapon. Promé ku esaki na 2025 el a gana e título di promé finalista Miss Universe Kòrsou. Samiah a drenta awor den su fase di preparashon pa bai representá Kòrsou na Tokyo i el a kompartí su konosementu i eksperensia ku nos di Djasabra.

E oportunidat a presentá

Hopi “spannend” e temporada su dilanti ounke e ta hañ’e un tiki kòrtiku. E ta haña 4 luna ta tiki pero e ta tuma kada momentu ku alegria, disfrutá e momentu i disfrutá di dje. Esaki ta promé bes ku Samiah ta representá Kòrsou internashonalmente pero na 2025 el a partisipá na Miss Kòrsou i el a keda komo promé finalista. Pa e tabata un bendishon pasobra el a trese mas oportunidat p’e i awor e ta bai representá Kòrsou internashonalmente a un sertámen hopi diplomátiko, hopi respetá i ta tuma lugá na Hapon, ku tabata Samiah su soño semper pa bishitá. Ku esaki el a bisa ku Dios tabatin un oportunidat p’e i esei ta su dilanti awor aki.

U soño ku a bira realidat

E mundu di beyesa tabata un soño p’e, ora e tabata mas hóben, k 16 aña. Semp’er el a gusta e parti di desaroyo personal i el a tuma e desishon di partisipá pero despues di su estudio. El a bai Ulanda despues di su VWO na Erasmus den Rechtsgeleerdheid. Esei a dur’e un tiki largu manera el a bisa. Semper el a keda ku e deseo di por representá Kòrsou, e deseo di bai partisipá i ta besig ku e parti di Beyesa a baha pero pa representá Kòrsou semper a keda. I ora el a kaba ku su estudio el a regresá Kòrsou. Samiah a kaba su bachelor i a bin Kòrsou pa e reto di Miss Universe Curacao i despues di esei el a sigui den Master den International Business Law i durante di e temporada ei el a haña e oportunidat pa representá Kòrsou i el a tuma ku man habri.

E mundu di beyesa no ta fásil

E sentimentu den un sertámen di beyesa ta duru i no semper fásil. E ta un persona ku ora e hasi algu e ta hasié bon i ta trata na focus riba loke ta dun’e alegria. E parti di proyekto sosial a inspir’é i dun’e felisidat i e ta purba focus riba esei. Miss International ta un organisashon/elekshon diplomátiko i nan ta balorá inteligensia i p’esei e ta purba lesa hopi i krese personal pero tambe den su desaroyo general. Kada bes ku e por bai un lugá i pone sonrisa riba un mucha su kara òf proyekto di tin impakto nashonal òf internashonal, e ta kla pa hasié. I esei a motiv’é i inspir’é den sertámen di beyesa.

Mas ku un Kunuku

Samiah ta besig ku un proyekto ku el a kuminsá kuné 2 aña  pasá  ora el a bin bèk di Ulanda. I awor den e elekshon internashonal e ta bai usa e oportunidat pa por engrandesé e proyekto aki na Kòrsou. I ku e haña mas sosten di minister di ekonomia i salú pa e konsientisá mas hende di e proyekto aki. E proyekto ta focus riba SDG12 ku para pa ‘Responsible Consumption and Productions’ . Samiah a splika na nan Kunuku nan a kuminsá un hardin kaminda ta kultivá bèrdura i fruta lokal i a sera un partnership ku Kontiki Beach Resort i ta resiklá einan tur nan produktonan di kushina. E mishon di Samiah ta pa konsientisá pueblo pa ta mas konsiente kon ta atendé ku Waste i realisá e impakto ku kada akshon chikí por tin impakto riba nos komunidat. I aki na Kòrsou nos ekonomia ta kresiendo hopi espesialmente den e sektor di turismo. I nos mester realisá nos responsabilidat. Ta inkreibel manera el a bisa pa mira kuantu produkto di kushina nan ta resiklá pa siman. E ta mas di 100 kilo pa siman pa 2 aña kaba. I ku e sobra di kushina ei nan ta traha kompos i ku esei práktikamente ta regenerá e tera. Ku e tera ei ta produsí bèrdura i fruta. E ta un sírkulo kaminda por mira ku abo komo hende tin impakto chikí pero tòg grandi. E lo ke inspirá mas hende pa produsí lokal. E no ta bon pa ekonomia so pero pa nos mes. E proyekto aki yama “Mas ku un kunuku” i danki na e plataforma aki e pro dun’e visibilidat. I loke bin e ta sumamente kontentu.

Planta ta duna mi trankilidat

Ya kaba e kunuku ta produsí hopi bèrdura i fruta. Samiah a splika Djasabra ku nan tin  berehein, spinazi, kròpsla tur sorto, kònkòmber, pampuna, tomati, i hopi mas. El a bisa ku e mes tambe ta planta i esei ta su pashon. E ta dun’e trankilidat. Den bida ta importante pa no lubidá e kosnan simpel, ta kosnan ku ta trese alegria i trankilidat i pas ku ta loke nos mester. Tur esaki a yuda Samiah den su trabou i den su bida personal. E ta simplemente su pashon.

E balor di produsí lokal

Su vishon i kiko e ta kere aden e ke trese den komunidat i mas serka di nos hendenan. El a bisa ku e plataforma aki e por duna e proyekto visibilidat i engrandese e proyekto pa trese na muchanan dor di bishitá skolnan, bishitá prisòn tambe ku a kuminsá ku un inisiativa asina aki i komo Miss International e ke sostené tur inisiativa ku tin di aber ku e proyekto aki. E ta kontentu ku aki na Kòrsou nos ta hopi konsiente i ta besig ta mira e balor di produsí lokal. I komo Miss International e lo sòru di promové e proyektonan aki.

Ser organisá

Samiah tin un kara hopi simpel i ku poko makiahe. El a konta nos di Djasabra ku e no sa usa hopi makiahe pero e gusta di ta den su propio kueru. Den e kaso di mundu di beyesa i representando Kòrsou, esei ta un trabou. Hopi hende no ta mir’e asina pero e tin di asumí e responsabilidat di representá su pais i kana nechi. E ta yuda bu den bida personal pa kana organisá. Ta un struktura ku ta laga bu krese komo persona. Pero no ta nesesario pa e hende muhé tin di partisipá na un elekshon di beyesa pa e hasi esakinan. Samiah a bisa ku e hende muhé por hasié ku su funshon di sea dòkter, abogado, kualke sea su posishon ta. Si e ke hasi un proyekto hasié. I si bo tin deseo di representá bo pais, e ta un bunita kombinashon. Su inspirashon semper tabata pa bira embahador di su pais i ta algu ku e por usa i kombiná su estudio, su deseo di representá Kòrsou, su amor pa Kòrsou.

Kombiná beyesa i estudio

Samiah su estudio no ta kla ainda pero el a mira ku e ta gusta desafio. E ta kere ku ora bo ta hóben bo tin di tuma tur oportunidat ku ta bin i hasi de lo mehor di dje. Su estudio ta kasi kla i ta  tésis so e falta. Tur kos ta planiá i dor di plania bo ta logra. I e ke ta inspirashon pa otronan. Bo por ta un reina, studia i traha i krese komo persona. Aktualmente e ta bibando na Kòrsou i Online e ta skibiendo su tésis.  E ta kere den kana ku tempu. Su estudio mes tambe ta hopi konsentrá riba komersio digital ku ta siña nan komo hurista kon ta anda ku e mundu digital. Kon pa atendé ku AI. Ántes e tabata wak AI komo algu negativo pero por us’e pa ta mas efisiente i asina awendia por kombiná nos pashon i vokashon i haña un balansa den bida personal i trabou.

Soña grandi

Dia 25 di novèmber awor, Samiah ta den elekshon na Tokyo Hapon.  Hapon ta konsentrá hopi riba inteligensia i kiko ke aportá na e organisashon i e ta wak e komo un trabou ku e por ofresé e organisashon na Hapon komo embahador di Kòrsou. E ke konsentrá riba oratorio. Tin momentu e ta insigur i ta duda i oratorio ta duna mas konfiansa propio. Tambe e ta konsentrá e parti físiko manera bo kuminda i salú i komo embahador di Kòrsou i su plataforma konsentrá riba kuminda lokal i salú e ke ta un hende muhé ku ta sòru pa su mes i kome salú. I e otro desafio ta ku e tin di disfrutá pasobra tin bia nos ta lubidá di disfrutá di e momentu. Tin bia komo isla chikí nos ta kere ku no por pero nos a logr’e. Blue Wave a inspir’é di soña grandi i disfrutá di dje.

Pa e bekado/studiante

Teniendo na kuenta ku nos ta den temporada ku hóbennan ta preparando pa sigui un paso mas dilanti den bida ku nan estudio Samiah a duna komo konseho pa semp’er kere den bo mes, nunka no lubidá esei. I komo yu di Kòrsou nos tin abilidat sigui perseverá. Ounke nos ta sinti falta di nos kas, nos ta fuerte. Keda kòrda riba bo meta i un dia bo ta logra. Nos mester eduká nos yunan i pone nan realisá ku nan por soña den bida den grandi. Si bo ke skohe un trabou Out òf the Box, bai p’e, traha duru pero nunka pèrdè e chispa. Ta e chispa ta duna nos bida propósito. Si e por duna un konseho pa loke ta estudio na Ulanda e ta bisa pensa grandi, sigui bo kurason i alfinal esei ta e kos mas importante.

Loke universo tin p’e, e lo tuma

Loke Samiah por primintí pueblo di Kòrsou ta ku semper tabata su deseo di representá Kòrsou den grandi i ni maske kiko ku pasa e anochi ei, e ta spera di por hasi nos komo yu di Kòrsou orguyoso. E lo dibertí i e lo ta su mes. Loke universo tin p’e, e lo tuma. Awor aki esei ta su focus i despues e lo sigui ku su karera.