Shete aña pasá Mandy Villasmil a yega Hulanda pa e sigui su estudio den medisina. Awe na momentu ku e ta terminando su estudio, e ta subi lista di Christen Democratisch Appel pa bai elekshon pa konseho munisipal dia 16 di mart 2022. Mandy, ku 27 aña ta number 8 riba e lista i ta komprometé su mes pa traha na benefisio di e hóbennan studiante di Karibe Hulandes. No solamente di Aruba, pais natal di Mandy, pero nos na Kòrsou tambe por konta riba su esfuersonan pa adelanto di en partikular e studiante.

 

Djasabra Tabatin e oportunidat di papia ku Mandy, kende awor aki ta ku fakansi na kas, den e kaso aki na Aruba. Semper el a gusta yuda hende i e sa di e problemanan ku studiantenan di Karibe Hulandes ta enkontrá, ora nan bai Hulanda. El a bisa ku e studiante ta laga su pais atras i tin diferensia grandi ora di sali for di kas i bai Hulanda. E mes a pasa den dje i hopi hende rònt di dje tambe. Kisas dor di bai den un plataforma manera e konseho munisipal, e por representá e studiantenan, trese e problemanan dilanti i asina duna un bos na e studiantenan. E sa ku e studiante tin hopi di bisa pero e plataforma no ta muchu aksesibel pa nan. I esei Mandy ke yuda kuné.

 

Kas te problema number 1

Mandy a duna un idea di kua ta e problemanan di mas grandi ku e studiantenan na Hulanda ta topa den nan kaminda. El a bisa ku e problema number un ta hañamentu di kas. E ta kere esei ta konosí pa kasi tur hende na e islanan tambe, ku e ta un problema prinsipalmente ora di bai den siudatnan grandi manera Den Haag. Tin organisashonnan pa studiante manera Duo òf Room ku ta yuda, pero tin biaha esei no ta posibel i tin bia e studiante tin di buska yudansa serka otro instansia. Einan tambe ta bira difísil, pasobra hopi ta puntra pa un bòrg. Un hende pa para responsabel na Hulanda. “Nos studiantenan ta bin di otro pais, hopi di nan no tin famia na Hulanda ku por para responsabel pa nan”, Mandy a bisa. Esei ta un problema hopi grandi ku tur ku el a papia kuné, ta trese esaki dilanti.


Difísil pa inskribí

Otro problema ku Mandy a enkontrá, ku e ta kere mester di atenshon ta e momentu di inskribí. Bo ta yega komo studiante bo so, i si bo tin suèltu bo ta haña yudansa por ehèmpel den nan kaso di Arubahuis i Kòrsou tin Kas di Kòrsou, pero no tur hende tin e privilegio ei. Si esei no tei, mester warda tin bia hopi luna pa haña BSN i ora tin esei por habri un kuenta na banko. Esei ta e problema, ku maske tin benefishinan dor di ta di Karibe Hulandes kaminda por haña e fiansa i otro derechinan ku otro hendenan di otro pais ku no ta di Reino Hulandes tin, tòg aki ta struggle hopi ku e mesun problemanan.

 

Gemeente Raad ta mas lokal

Ku bista riba e problemanan ariba menshoná, Mandy a bisa ku e ke papia ku mas tantu hóben posibel pa e sa eksaktamente kiko ta nan problemanan i pa e por trese esaki dilanti den konseho di munisipio. E kos di Gemeente Raad ta ku e ta hopi lokal. E no tin di bai ful te na un minister, e no tin di bai Tweede Kamer pero e ta djis hib’é Den Haag, na e Gemeente Raad i asina por papia di dje i tuma desishonnan ku no ta asina grandi ku ta afektá un regio grandi, pero por dal e pasonan pa trese un kambio tòg. E ke duna e bos ei na e studiantenan di Karibe Hulandes. El a bisa ku no tin muchu representashon den e Gemeente Raad pa e studiantenan pa Karibe Hulandes òf pa e hendenan di Karibe Hulandes mes.

 

Representá Kòrsou tambe

Apesar ku Mandy ta di Aruba, e ta representá nos aki na Kòrsou tambe i p’esei e ta referí na Karibe Hulandes, asina Mandy a bisa. El a bisa ku nos tur ta ruman i ta keda ruman. E ta kere ku nos un tin di yuda otro.

 

Den CDA por logra mas

I dikon Mandy Villasmil a skohe pa Christen Democratisch Appel pa e forma parti di dje? El a splika Djasabra ku CDA ta esun ku a aserk’é. “Mi a hañ’é un inisiativa interesante di nan, ku nan kier buska hende di diferente achtergrond pa representá e  populashon multikultural di Den Haag. Tambe mi semper tabatin e idea di hasi algu polítiko mas lat den bida, pero nan a hasié un tiki mas tempran pa mi. Loke ta bon di CDA ku e ta un partido sentral. Esaki ke men ku nan por duna oido na tur dos banda, esta e banda konservativo i liberal i tur hende por bisa algu i nos ta purba yega na un kompromiso. Si por ehèmpel bo ta di un partido hopi konservativo i hopi règt i hende tin idea liberal esta links, e no ta bai muchu bon pasobra e partido ta keda konservativo pero den un partido sentral bo por skucha di tur dos banda i asina yega na un kompromiso, pa tur dos banda por keda relativamente kontentu, kisas no kompletamente pro pero yega na algu ku tur hende ta mas satisfecho kuné.”, Mandy a splika nos.

 

Sali di famia polítiko

Mandy ta bin di un famia polítiko. Su famia semper tabata aktivo den polítiko i e semper a kana huntu ku nan i el a sintié yama pa e tambe ta den polítika. Na Hulanda e elekshon ku e ta partisipá na dje ta dia 16 di mart. Mandy a splika ku pa loke ta e elekshon ei ta un reto e aña aki pasobra pa medio di Corona hopi kos ta bai diferente. E ta algu nobo pa tur hende. E polítikonan mas bieu tambe ta algu otro pa nan pasobra nan tin di kampaña den un situashon di Corona ku ‘lockdown’ i ku mayoria kontakto ku hende ta bai via Zoom òf kualke otro plataforma virtual. E votamentu lo bai meskos ku semper ounke tin di tene e distansia di un meter i mei for di otro. E ta un reto segun Mandy i e ta spera ku mas despues di aña nobo lo por relahá e reglanan un poko.

Lo por sigui den polítika

Drentando e konseho munisipal pa CDA ta nifiká ku Mandy ta hasi apertura pa un karera den polítika tambe. El a bisa ku e posibilidat tei ku kisas tambe den polítika na Aruba òf mas leu den polítika na Hulanda mes. Te ainda e no por bira sigur pasobra awor aki e ta konsentrando pa kaba su estudio di medisina. Na mart e ta kana i despues e ke spesialisá i despues e lo wak kon leu e ta yega den polítika.

 

Estudio komo dòkter

Mandy mes tin aktualmente 7 aña na Hulanda i ta studiando medisina. El a yega Hulanda na 2014 ku 19 aña di edat. El a kuminsá ku medisina ku a bai bon, un estudio masha interesante i diferente. El a kore stazje na Aruba mes i na Hulanda i einan e ta wak e diferensia kon e hendenan ta i bo ta siña di e forma ei kon atendé ku hende di tur dos banda. Ta un estudio ku a siñ’é hopi di dje mes i a yud’é desaroyá mas komo persona. Na mart awor e ta gradua i e lo ta ‘basis arts’. Esaki sinembargo no ta e punto final pa Mandy pero e lo sigui spesialisá. E prosedura pa spesialisá ta dura algun aña, pero e lo keda na Hulanda miéntras tantu sigur pa e próksimo 5 pa 6 añanan.

 

Den konseho munisipal por logra hopi

Mandy ku 27 aña ta subi un lista di un partido polítiko, den e kaso aki di CDA. Esaki no sa sosodé hopi ya ku hóbennan no ta sinti nan masha bia yama pa ta riba un lista polítiko. Mandy Villasmil sinembargo ta bisa ku hopi hende no ta konsiente kuantu kos nan por logra dor di partisipá den elekshon di un partido pa munisipio. Ei den bo ta logra mas. E elekshon di munisipio ta un manera pa stimulá mas hende pa ta mas aktivo den polítika. Pero e no ta kere ku hopi hende sa di esei, prinsipalmente esnan mas hóben di Karibe Hulandes kisas no ta na altura di esei. E mes promé ku el a yega Hulanda e no tabata sa. Mandy ta kere mester hasi e hendenan mas konsiente di esei, hasi nan mas konsiente ku por hasi diferensia na nivel lokal. Si tin un hende pa representá spesífikamente esnan di Karibe Hulandes ta mihó ainda. I p’esei ta masha importante pa hende ta na altura di e Gemeente Raad kaminda por solushoná muchu mas i mas e hende sa mas e lo ta interesá pa partisipá den polítika. I Mandy ta konvensí ku e ta kere e por trese un kambio den esaki i e ta spera ku e lo por hasié, ya ku esei ta e intenshon. E ta purbando kaba di papia ku mas hende posibel pa e hasi nan konsiente di esaki i pa e hendenan sa ku si un hende di Karibe Hulandes por drenta Gemeente Raad ta nifiká ku e hende di e islanan ei tin un bos mas prominente.

10 aña

Mandy ta spera ku pa aki 10 aña el a kaba di spesialisá su mes. E no sa presis unda e lo ta bibando pero si ta na Hulanda e ta e ta kere ku e lo ta trahando komo spesialista i e lo ta aktivo den polítika ainda. E no sa ainda riba ki nivel pero lo wak kon esaki lo desaroyá su mes. E ta kere ku na nivel lokal semper lo ta algu bon pa keda aktivo den dje asta ora e bai pa elekshon na nivel mas haltu i esaki spesial na Den Haag kaminda e populashon di e studiantenan di Karibe Hulandes ta asina grandi.

 

 

 

LAGA UN KOMENTARIO

Please enter your comment!
Please enter your name here