Rosalia ta refutá ponensia di Ministerio di GMN
WILLEMSTAD.- “Niun momentu so den nos lucha nos a pidi niun hende vota pa nos. Nos a hasi nos trabou komo un deber sosial ku nos tin komo siudadano di e área aki.” Asina bosero di ‘Unidat di Habitantenan di Pariba’, Giselle Rosalia a deklará pa EXTRA riba loke por konsiderá un atake direkto di Ministerio di Salubridat, Medio Ambiente i Naturalesa (GMN) kontra su persona.
Den un komunikado emití relashoná ku e problema di dùmpmentu di mèst na Dam Pretu, e ministerio ta bisa: “Na mes momentu e inkietut públiko ta sigui oumentá debí na deklarashonnan di señora Giselle Rosalia, di e partido polítiko Movementu Kousa Promé (MKP), kual ta posishoná su mes firmemente den e debate tokante Dam Pretu. E ministerio ta señalá ku señora Rosalia su deklarashonnan ta motivá pa un deseo di skor polítikamente. Tambe ta notabel, ku e komo lider di e úniko partido ku ta defendé independensia di Kòrsou, ta boga pa sera un produktor lokal importante di webu. Esun ku ta lucha pa independensia mester netamente protehá i fortalesé e produkshon lokal.”
Rosalia ta splika ku e kapítulo di Dam Pretu a kuminsá na 2024 ku molèster okashoná pa dumpmentu di shushi ilegal. A kana un trayekto huntu ku un grupo di trabou di Ministerio di GMN i Ministerio di VVRP. A sera e área, a habri lèntfil, a konsientisá poblashon di Kòrsou i pone bakinan pa rekohé shushi den barionan, Rosalia ta splika.
“Na aprel 2024 no tabatin elekshon, pues no ta pa skor polítiko a move nos pa hasi esaki, pero e deber sosial ku nos tin komo humanista, yu di Kòrsou i habitante di Sint Joris pa duna e komunidat ku nos ta biba den dje, forma, koló i kontenido. Na momento ku tin un problema na St. Joris, Lagun, Jeremi, Caracasbaai, Sta. Martha òf kualke otro área na Kòrsou, nos komo yu di Kòrsou mester sali uní pa derecho di habitantenan”, Rosalia ta deklará.
E ta sigui splika: “Banda di esaki mi ta mucha di Sint Joris. Mi a piska, hunga i kampa den e área. Mi tabata bishitá kareda di kabai na Koraal Tabak. Pa nos Dam Pretu tin un balor emoshonal tambe banda ku e ta simplemente un área di agrikultura. Si ta hasi daño na e área aki nos komo habitantenan i bisiña di Dam pretu mester sali dilanti.”
Reakshonando mas aleu riba e komunikado di Ministerio di GMN, Rosalia ta bisa ku nunka den e trayekto di buska solushon pa e dùmpmentu di mèst na Dam Pretu no a eksigí pa sera e fábrika di webu ‘Moderno’ pasobra habitantenan di pariba ta hendenan kuerdo i bon na tinu. “Nos sa ku ta trata di produkshon lokal kaminda hende ta traha pa gana nan pan di kada dia. Webu ta sumamente importante den tempunan di pobresa kresiente. Webu a bira prinsipal pa sierto hende ora nan ta kome aros ku webu, pues produkshon di nos propio kuminda ta importante pa Kòrsou.”
E bosero di Unidat di Habitantenan di Pariba ta finalisá bisando ku nunka den defensa di Dam Pretu habitantenan a hinka polítika aden i nunka a bisa ku e akshon ta un akshon di partido Kousa Promé. “No a pidi niun hende vota pa nos i no a bisa ku e fábrika mester sera. Ta ora ta manipulá ku informashon i balotá inteligensia di un komunidat ta haña e tipo di reakshonnan aki.”
Foto:
…Giselle Rosalia…
