Kandidato presidensial peruano Roberto Sanchez di “Juntos por Perú” ta mustra su papel di vota promé di a depositá esaki den buzòn.
LIMA (AFP).- Polis- i fiskalnan ayera a drenta Ofisina Nashonal di Proseso Elektoral (ONPE) despues ku mas ku 60.000 votadó a keda sin vota den elekshonnan presidensial di Perú pa falta di instalashon di mesanan, segun a informá. Den oranan di mainta, e organisashon elektoral a indiká ku tabatin retraso den entrega di sédulanan, papelnan i otro materialnan elektoral den e sentronan di votashon di algun distrito di Lima.
Agentenan di polis anti korupshon i fiskalnan ”a realisá entrada den ONPE i den e empresa” enkargá ku repartishon di sélula, papelnan di votashon i otro materialnan elektoral”, segun informe ofisial.
Di akuerdo ku desishon di outoridatnan elektoral, e mesanan no instalá te ku 12’or di mèrdia mester a keda anulá, pero despues di dos ora esei ainda no tabata e kaso. Den 15 lokal di votashon, no a logra instalá mesanan i esei a afektá 63.300 siudadano ku derechi di voto.
Hurado Nashonal di Elekshon tambe mas lat a prolongá e ora di klousura di urnanan, di manera ku urnanan por a sera te 6’or di atardi.
