WILLEMSTAD.- Pronto ministerio di hustisia ta lansa e proyekto ”Aktua Robes, Sintié Un Bes” den periodo di marchanan di karnaval. E proyekto aki ta ser kondusí pa KPC i OM. Ta for di aña 2015 a lansa e proyekto aki durante di karnaval. Tabatin un lista di infrakshon pa kual ta haña butnan pisa.
Ayera Minister di hustisia Shalten Hato a indiká ku na su ministerio a tuma lugá un di e vários reunionnan ku gruponan di interes ku ta ehersé nan labornan den e ámbito hudisial.
Minister Hato i su delegashon a reuní ku Tim di Maneho di Kuerpo Polisial di Kòrsou, Fiskal mayó di OM i demas fiskalnan i tambe e tim di e proyekto Sendé Sendé. A papia entre otro tokante proyektonan di konsientisashon na skolnan pa ku karnaval ku enfoká riba seguridat di nos hóbennan manera seif sèks i tambe bebementu di alkohòl.
KPC i OM a duna splikashon detayá di e proyekto ”Aktua Robes, Sintié Un Bes” kual lo ser lansá pronto.
Pues p’e marchanan di karnaval tambe lo tin butnan severo ku lo keda repartí p’esnan ku no por komportá nan mes.
