Ménos ku 50% na Kòrsou a bakuna

WILLEMSTAD.- Epidemiólogo dr. Izzy Gerstenbluth ta splika ku e tim di epidemiologia ta konsiente dje preshon di komunidat pa habri Kòrsou pa asina tur hende por bai bèk na normalidat. Por laga lòs, pero mester keda tene na kuenta ku e vírus di Corona, spesialmente e variante britániko ta esun ku ta plama lihé. Ademas no mester pèrdè for di bista ku apesar di tantísimo esfuerso di Gobièrnu, profeshonalnan di salubridat i otronan, ménos ku 50% di hendenan na Kòrsou a bakuna. Esei ta kontando e hendenan indokumentá tambe aden. Gerstenbluth a enfatisá ku e si e tim di epidemiologia tei pa sirbi pueblo di Kòrsou den su totalidat i no un òf otro Gobièrnu na turno. Ta a base profeshonal e tim ta sirbi pueblo.

Tirando un bista riba e sifranan di dia Gerstenbluth a duna di konosé ku di e 396 tèstnan ku a hasi den fin di siman a registrá 4 kaso positivo nobo di Covid. Tin 73 kaso ku a saka for di isolashon pa yega na un total di 318 kaso aktivo. Tin 52 persona hospitalisá di kua 24 ta den kuido intensivo anto ainda tin un grupo na Aruba. E sifranan ta bayendo bon loke ta motibu pa kuminsá suavis, pero mester hasié di forma kouteloso. Mester evitá ku ta pone demasiado preshon riba e kuido den hospital.

Gerstenbluth a bisa ku e tabatin miedu di e situashon promé ku elekshon i p’esei el a atvertí, pero a laga elekshon tuma lugá ku tur e konsekuensia ku esei a trese kuné. Kòrsou a yega na 22 morto di Covid for di komienso di e pandemia te na mart 2021 i dentro di un luna e kantidat a bula bai 111. Esei ta sosodé na momentu ku tin un plamamentu di e vírus i no por kontrolá e situashon. Mas detaye den edishon di EXTRA.

LAGA UN KOMENTARIO

Please enter your comment!
Please enter your name here