E famoso (peligroso) brel ku lèns inteligente (skart glasses).
PARIS, Fransia.- Ministerio públiko di Paris a informá di a kuminsá ku vários investigashon relashoná ku denunsianan di hende muhé ku ta bisa di a keda filmá riba kaya ku lènsnan inteligente (‘smart glasses’) sin nan konsentimentu. Kualke hende ku tin un dje tipo di brelnan ei na kara por saka potrèt, graba video, skucha muzik, hasi yamadanan di telefòn, tradusí teksto ku asistensia di inteligensia artifisial.
E dispositivonan di Meta, desaroyá den kolaborashon ku Essilort Luxottica, fabrikante di Ray-Ban, a bira un éksito komersial. Meta a bende alrededor di shete mion di nan den 2025.
Otro empresanan, manera Google i Snap, tambe ta prepará pa lansa brelnan ku funshonnan di IA. Na Europa, e yamadanan a multipliká kontra di brelnan inteligente despues di aparishon di grabashonnan hasí na un manera klandestino di hende muhé, kompañá pa un petishon di Reino Uni pa eksigí prohibishon di su benta.
Na Fransia, e asosiashon e-Enance, ku ta atendé ku e linia di telefòn nashonal pa víktimanan di abusu riba websitenan, a lansa un alerta di prinsipio e luna aki relashoná ku videonan grabá ku brelnan ku tin kámara i ku despues a keda kompartí riba Internèt. Fiskalnan di Paris a indiká di a risibí “denunsianan riba mishimentu di bida privá relashoná ku uso di brelnan inteligente”.
Na Paris e filmashon di hende riba kaya i publiká esaki riba internèt ta keda kastigá ku te hasta dos aña di prizòn i un multa di 45.000 euro.
E fiskalnan a splika ku den algun kaso, tambe a start investigashon pa agreshon seksual ora ku “e susesonan ta bai kompaña ku kontakto seksual sin konsentimentu”.
