WASHINGTON, AFP.- E hefe di diplomasia merikano Marco Rubio a revelá ayera un proyekto di reorganisashon di departamento di Estado ku ta baha e puestonan, algun di nan di derechinan humano, i funshonnan konsiderá leu di e ophetivonan ideológiko di presidente Donald Trump.
E aparato diplomátiko merikano tin hopi tempu na un punto di mira di e konservadornan, partidarionan di un gobièrnu ménos sentrá den promoshoná balornan konsiderá progresista.
“Den su forma aktual, e departamento ta sobrekarga, burokrátiko i inkapas di kumpli ku su mishon diplomátiko esensial den e era nobo di kompetensia entre e potensianan grandi”, asina Rubio a bisa den un komunikado refiriendo na e rivalidat di Merka ku China.
E reorganisashon anunsiá ta di akuerdo ku supreshon di un divishon enkargá di defensa e seguridat di sivilnan, demokrasia i derechinan humano.
E lo keda supstituí pa un instansia nobo di koordinashon pa yudansa eksterior i asuntunan humanitario i apsorbé loke ta keda di USAID ku tabata e agensia di mas grandi di asuntunan humanitario di henter mundu i a keda redusí na e mínimo ekspreshon pa Trump despues di a asumí poder.
