“Palu’Grandi” A Kai Den Montecarmelo…
WILLEMSTAD.- Deporte di Kòrsou ta di luto ku morto di Alvin, “Fichi” Fleming, “Hall of Famer” i hòmber ku a nifiká masha hopi pa spesialmente nos beisbòl/sòftbòl. Nos tabatin e plaser di a lanta hopi serka di e bario di Montecarmelo kaminda “Fichi” a biba pa masha hopi aña. “Fichi”, un dje hopi rumannan di famia Fleming tabata un ídolo di e bario. Apesar ku henter e famia tabata metí ku beisbòl, e gran ídolo tabata “Fichi”. Mas ku 60 aña pasá nan a lanta den Montecarmelo e tim di Montecarmelo Braves, siendo mayoria di nan ta fanátiko di Milwaukee Braves. “Fichi” a hunga beisbòl den e tim di “Yoki” Van Utrecht (dfm) ku ta Jong Curaçao i segun nos tambe den Antillanos, pero tabata den Blue Hawks kaminda e la konsagrá su mes komo strea.
…Estrea Di Blue Hawks…
“Fichi” tabata e strea di e organisashon Halcon di Rif, komo tersera/base i di tres/bate ku tabata un revelashon den nos beisbòl. I ku na aña 1970 a bira kampeon di Kòrsou i Antia. “Fichi” tabata un pelotero fogoso, ku tabata hunga ku “kabei na djente”. Serka e periodista Sr. Florian Heymans (dfm), “Fichi” a haña e nòmber di “Infant Terrible”, ya ku e no tabata tuma nada. Pa su produkshon na bate na momento krusial, nan tabata yam’é den prensa tambe, “Mr. Clutch”. “Fichi’Flè” a kue masha hopi título individual den nos beisbòl doble A manera: Kampeon di Bate, Lider di Kareda Empuhá.
…Pilar Di Nos Selekshon…
E “Halon’Mayo” huntu ku peloteronan manera: Willie Pietersz, Raffy Jozefa, Wenny Jakoba, “Lipo” Elhage, Antonio Keller, Henry Jones, Teofilo Wester, Jozef Martina, “Pajou” Briezen, Rudy Anastacia, Richard Moesker, Richard Simon, Rudsel Paulina, Frank Mari, “Lonte” Balentin i “Djodjo” Wilsoe pa masha hopi aña a forma base di nos selekshon di beisbòl di Kòrsou i Antia Ulandes ku a defendé nos bandera ku hopi honor den region i tur parti di Mundu. Den e torneo tradishonal di beisbòl di Haarlem, “Fichi” a yega di gana e honor di Hungadó Mas Valioso. “Fichi” Fleming a representá nos Pais den no ménos ku 3 kampeonato mundial di beisbòl.
…”Fichi” komo entrenadó/mènedjer…
“Fichi” despues di su karera komo pelotero aktivo a bai Springfield College kaminda el a keda algun luna i spesialisá komo entrenadó. Bèk na Kòrsou “Fichi” Fleming mesora a bai traha ku peloteronan hóben di bario i ku su tim St. Augustinus el a sa di kampeonisá den beisbòl hubenil ku masha hopi prospekto ku despues a bira strea den nos beisbòl prinsipal. “Fichi” su éksitonan no a keda únikamente den beisbòl hubenil. El a guia su organisashon Blue Hawks na klasifikashon den beisbòl doble A despues di hopi aña i tabatin hopi éksito manehando organisashonnan manera: Groot Kwartier Stars, Wild Cats i tambe Royal Scorpions. “ Fichi” sea a manehá o tabata den kuerpo tékniko di masha hopi selekshon di beisbòl. Huntu ku selekshon “Fichi”, o tambe “Fichi’Flè” a gana medaya di bròns den Juegos CAC na Cuba i tambe medaya di plata den Juegos na Puerto Plata, RD. Tambe “Fichi” a dirigí beisbòl na Ulanda huntu ku Sr. “Chicho” Jesurun (dfm). Huntu ku esei pa masha hopi aña e tabata motor tékniko di e prestigioso organisashon di sbc Swift di “Pipi” Jesurun (dfm) i Sergio Leon. El a dirigí tambe e tim di sòftbòl fastpitch maskulino “Indju Country Club” di Sr. Sonny Sparing (dfm). Huntu ku tur esei tambe hopi selekshon di beisbòl hubenil i tabata yuda den preparashon di nan spesialmente huntu ku su amigu/ruman “Chado” Obispo. Tambe el a traha den Copabe, identidat regional di beisbòl komo direktor di kompetensia na vários okashon.
…Di U.T.S. Pa Sedreko…
Fichi” kariñosamente yamá pa nos komo “Peloton” a traha pa hopi aña na U.T.S. pero despues el a pasa pa Fundashon Sedreko kaminda promé el a kuminsá den atministrashon, pa despues wòrdu ubiká pa su amigu “Lipo” Elhage den Stadion Odulio Willems kaminda e tabata dirigí e fasilidat deportivo aki. Tambe nos tabatin e plaser pa huntu ku “Fichi” enkabesá vários kurso di beisbòl/sòftbòl ku a produsí vários entrenadó di nivel pa nos deporte.
…Salon Di Fama…
“Fichi” dia 21 di yüni di 2016 a drenta Salon di Fama di nos deporte ku ta kai bou di FDOK. Na 2021 tambe FEBEKO a dediká e kampeonato lokal di beisbòl na su nòmber, Alvin “Fichi’ Fleming.
…Hopi Stimá…
“Fichi” tabata un hòmber di masha hopi amigu, stimá pa su peloteronan, pasò apesar di tabata fuerte na karakter, e tabat’ei semper 24/7 pa su muchanan. Den famia e tabata un pilar, stimá pa tur ruman i subrinonan. “Fichi” semper tabata esun ku tabata hiba palabra na tur entiero pa doloroso ku esei por tabata di famia Fleming i ku un trankilidat i firmesa úniko.
…Un Bashí…
“Fichi” ta laga un bashí difísilmente pa yena den famia. Aunke bida lo tin di sigui. Un danki spesialmente su rumannan: “Mèlda” i “Baby”, tambe na nos amigu/ruman (nan) “Zef” i Owin i tur ku yuda kuida i wak “Fichi” te djaluna mardugá. Kondolensia na su yunan: Thessa i André. Na tur su amigunan ku konstantemente tabata informá i puntra p’é. “Fichi” a “bai”, i pa doló ku esei ta hasi, tin di aseptá ku “Fichi” su sufrimentu a kaba i ku e ta bon kaminda ku e ta. “Fich’Flè” o Peloton, danki pa tabata nos tur su amigu. Te Despues…
Skibi pa: “Taffy” de Jongh.
(Nos ta preparando un spesial di vários anékdota di “Fichi”, keda pendiente pa esei..)
