ROTTERDAM.- Gobièrnu di Kòrsou konhuntamente ku CINEX a organisá “Baseball Means Business” kaminda a invitá invershonistanan internashonal establesé na Oropa i invershonistanan na Ulanda mes pa sera konosí ku e potensialnan ku nos isla tin.
Minister di Ekonomia Steven Martina den un forma elokuente a trese e potensialnan di Kòrsou kuminsando ku nos deportistanan, manera Hensley Meulens ku ta grandi den Major League Baseball i un Kenley Jansen ku ta e deportista mihó pagá den Reino Ulandes. No por a laga Andruw Jones afó komo esun mas popular i konosí den Reino i ku a drenta Hall of Fame di Atlanta Braves aña pasá.
Aparte di esei sr. Martina a mustra riba e oportunidat grandi ku Kòrsou ta brinda pa deportistanan por bin praktiká na Kòrsou ora ku den nan pais mes manera Ulanda ta temporada friu. Tambe Minister Martina a mustra riba e grandesa di e atleta Churandy Martina i tambe Jean Julien Rojer.
Mas aleu Minister Steven Martina a mustra riba e futuro di Kòrsou ku ta mustra briante, entre otro ku un renobashon di refineria , e posibilidatnan teknológiko i e di dos Mega Pier ku ta na kaminda.
Di un forma masha kla ilustrá ku “ powerpoint” sr. Martina a mustra tur presente riba e posibilidatnan úniko ku Kòrsou ta ofresé.
“Baseball Means Business” ta un forma di laga tur hende komprondé ku deporte por kana sam sam ku hasimentu di negoshi. Paddy Roomer, direktor komersial di KNBSB, a organisá esaki e aña’ki na mart na Seoul, Sur Korea, durante di World Baseball Classic 2017 kaminda a mustra riba e potensialnan di Kòrsou den Reino Ulandes.
Minister Plenipotensiario Anthony Begina a bisa ku komo Kas di Kòrsou nan mester karga e akuerdo di gobernashon den kual tin tambe ku mester trese invershonistanan Kòrsou pa drecha nos situashon ekonómiko, trata pa baha e pobresa den nos pais.
Minister di Finansa Kenneth Gijsbertha tambe tabata presente i a mustra riba e echo ku si invershonistanan bin invertí na Kòrsou esaki ta nifiká ku balansa finansiero tambe ta haña un “boost” enorme. Gijsbertha tabatin masha bon palabra pa e forma elokuente ku minister Steven Martina a presentá nos pais su potensialnan den “Baseball Means Business” na Rotterdam.
