DESAPARISHON MISTERIOSO

KRALENDIJK — Outoridatnan lokal ta preokupá pa desaparishon di un dama ku tabata biahando na bordo di e barku Carnival Horizon, ku tabata den haf di Boneiru djárason. Na momentu ku e barku mester a bandoná Boneiru den oranan tempran di anochi djárason ainda e dama aki, Jessica Collins di 47 aña, no a akudí. Kapitan di Carnival Horizon a disidí di lòs kabuya i e barku a sali pa su siguiente destinashon. Polis den oranan di lat di ayera mainta a informá ku e dama Jessica Collins ta pèrdí na Boneiru, na unda el a baha despues ku e barku a mara na waf. Na mes momentu nan a pidi búskeda dje. Nada ainda Te ayera nochi, momentu ku BONERIANO a pidi ‘update’ di e kaso serka bosero polisial, el a bisa ku no a haña Jessica Collins, ku aparentemente ta di nashonalidat merikano, pero polis no a duna e detaye aki. Loke sí a manda prensa ta foto di e señora pèrdí. Durante dia di ayera no a logra establesé kontakto òf lokalisá Jessica. Polis konsekuentemente ta pidi un i tur ku por a mira òf ku por tin mas informashon tokante paradero di Jessica, pa tuma kontakto mesora ku polis na 911, 715-8000 òf via di e liña di tep anónimo 9310. Internashonal Mientrastantu por a nota ku prensa internashonal a kuminsá dediká atenshon na e kaso aki. Interesante ta ku anteriormente e aña aki tambe tin un dama ku mesun nòmber a pèrdè na Merka. No por bisa ku ta e mesun persona ku ta pèrdí awor na Boneiru. E kaso di desaparishon di Jessica Collins ta mustra hopi similaridat ku e kaso di un dama mèksikano ku tabata riba un barku di turista, ku tambe a disparsé misteriosamente ora e barku tabata den haf di Kralendijk. Despues a bin topa ku su kurpa derá den un kunuku na Playa Grandi. Un hòmber lokal a mat’é. E tabata tripulante di e barku en kestion. Polis no a spesifiká ku e dama Jessica Collins tabata tripulante òf turista di e barku Carnival Horizon. No a duna masha otro detaye ku lo por kontribuí na informashon di públiko pa haña klaridat den e kaso aki. Imágen di kámara Si bai bèk e kaso di algun aña pasá, loke a hunga un ròl importante tabata imágennan di kámara ku polis a logra haña di su moveshonnan den sentro di Kralendijk. Tabata asina ku a nota ku e tripulante ei a hasi kontakto ku e hòmber ku despues a resultá su asesinato. Ta konosí ku na vários negoshi den Playa nan ta hasiendo uso di kámara di vigilansia i siguridat. Imágen di e kámaranan aki lo resultá klave den solushon di e kaso aki. Mientrastantu den komunidat boneriano tin preokupashon pa desaparishon di Jessica Collins. Ta teme asta pa su bida, pasobra a pasa un dia kaba sin sa di su paradero.