WILLEMSTAD – Desaroyadó di e proyekto na Zakitó a reakshoná riba e preguntanan ku Movimentu Save Zakitó a lansa tokante futuro di e laguna, brùg, playa i Koredor, i ta sigurá ku nan proyekto no tin intenshon di limitá akseso públiko na e áreanan aki.
Segun e desaroyadó, Gobièrnu ta doño i tin derecho riba e parselanan di laman kaminda e marina ta keda desaroyá. “Segun nos ta komprondé ta ku gobièrnu tin intenshon di duna derechonan di uso òf otro derechonan riba e parselanan di laman den laguna di Zakitó, na promé instante na un instansia públiko.”
E instansia aki probablemente lo ta un NV di gobièrnu òf otro entidat públiko ainda pa determiná. Esaki despues por duna e derechonan nesesario di uso na ‘The View Marina B.V.’, kompania afiliá ku e desaroyadó.
Esaki ta nifiká ku, segun e desaroyadó, e maneho final i kondishonnan di uso di laguna ainda no ta kompletamente determiná.
The View Marina lo manehá brùg
Tokante e brùg ku ta subi na Koredor, e desaroyadó a indiká ku personal di The View Marina B.V. lo manehá i oper’é bou di un polítika di maneho ku ainda mester keda koordiná i stipulá.
Ainda nan no sa kuantu moveshon di boto por spera diariamente. Sinembargo, nan ta konsiderá pa tene e brùg será, òf habrié solamente ku limitashon pa tráfiko marítimo, durante e oranan ku mas hende ta kana i kore riba Koredor mainta trempan i na final di atardi. E intenshon, segun nan, ta evitá ku usuarionan di Koredor mester spera kontinuamente pa e brùg habri i sera.
E brùg ya a keda di tèst i ta den uso. Segun e desaroyadó, un moveshon kompleto — habri brùg, laga un boto pasa i bolbe sera — ta dura alrededor di sinku minüt.
Tokante e preokupashon ku Save Zakitó a ekspresá pa kontrabanda, tráfiko di hende i entrada ilegal di arma, e desaroyadó ta kontestá ku persona i boto ku drenta Kòrsou via e marina ta kai bou di kompetensia di Douane, Wardakosta i Kuerpo Polisial di Kòrsou, meskos ku botonan ku drenta pais via otro haf.
‘Nos no tin plan pa playa privá’
E desaroyadó ta nengá ku tin plan pa hasi e playa eksistente privá. E playa chikí tras di e kibradó di ola na banda di brùg lo keda públiko, segun nan. Ora e último trabounan rondó di e brùg terminá, nan ke drecha e sitio ku mata nobo, palapa i santu. A planta tres mata di datu banda di e kasita di operador di brùg i tin plan pa pone mas mata, banki i baki di sushi pa hasi e área mas agradabel pa hende ku ta usa Koredor.
Tokante plan pa un playa artifisial nobo na altura di e antiguo edifisionan di Sundance, e desaroyadó ta bisa ku esei no ta parti di nan proyekto i ku pregunta tokante esei mester bai na gobièrnu.
‘Portierhuis’ ta pa operá brùg
Un otro punto ku Save Zakitó a lanta ta e pèrmit pa konstrukshon di un ‘portierhuis’.
Segun e desaroyadó, e edifisio en realidat ta e kasita di operador di e brùg nobo i no un punto pa kontrolá entrada na Koredor òf playa. “E petishon pa pèrmit di konstrukshon a keda entregá 5 di ougùstùs 2025 i otorgá 21 di ougùstùs 2026.”
Tabatin falta di klaridat di konstrukshon di e kasita tabata si esaki tabata kubrí sufisientemente bou di e pèrmitnan ku ya a keda otorgá pa konstrukshon di e brùg. P’esei a disidí pidi un pèrmit separá spesífikamente pa e kasita.
E desaroyadó ta enfatisá ku e edifisio ta sirbi únikamente pa operashon di e brùg i no pa regulá, limitá òf kontrolá akseso na Koredor òf playa.
Ta rekonosé ku mangrove a keda kita
Riba e punto ambiental, e desaroyadó ta rekonosé ku algun mangrove a keda kita na algun lugá rondó di e laguna di Zakitó, pero ku e daño ta muchu mas limitá ku loke Save Zakitó a sugirí.
Segun sifranan ku nan a presentá, aktualmente tin alrededor di 52 mil meter kuadrá di mangrove, miéntras ku ménos ku 4 mil meter kuadrá di área ku tabatin mangrove a keda kita pa e proyekto.
Ta kalkulá ku alrededor di 92% di e área total di mangrove a keda konservá, miéntras ku ménos ku 8% a keda eliminá.
Segun e desaroyadó, mangrove ku a keda kita pa konstrukshon di apartamentunan no tin obligashon di replanta. E mangrove nan kitá pa konstrukshon di marina sí tin obligashon di replanta.
Apesar di esei, e desaroyando ta bisa ku nan a disidí boluntariamente replanta mangrove tambe pa kompensá esnan kitá pa desaroyo di e resort.
A buska konseho di CARMABI i Curaçao Outdoor Industry Alliance (COIA) tokante kon, unda i kua tipo di mangrove mester keda plantá. Segun e deklarashon, CARMABI a indiká ku no por yuda nan, miéntras ku nan ainda ta sperando un kontesta di COIA.
Posibel restrikshon den laguna
E desaroyadó ta sigurá ku e proyekto lo no limitá akseso na playa eksistente, zona di kosta públiko ni Koredor.
Sinembargo, tokante laguna mes nan ta laga habrí e posibilidat ku por tin algun restrikshon pa motibu di seguridat. Un ehèmpel ku nan ta menshoná ta un posibel prohibishon pa landa den e ruta kaminda botonan ta pasa. “No por duna muchu detaye ainda pasobra kondishonnan di maneho i uso di laguna no a keda stipulá.”
Alabes, e desaroyadó ta bisa ku nan ke traha huntu ku gobièrnu pa krea espasio pa rekreashon den i rondó di laguna. Un di e ideanan ta un zona limitá den laguna kaminda públiko por landa, hunga i hasta risibí lès di landamentu gratuitamente.
Finalmente, e desaroyadó a bolbe invitá Save Zakitó pa sinta na mesa pa dialogá tokante e proyekto. Segun nan, a hasi e invitashon aki anteriormente, pero Save Zakitó no a asept’é.
