WILLEMSTAD.- E desaroyadó di e proyekto The View Resort & Marina ku ta na enkargo di GMFB, a indiká ku nan lo bai na drecha e asera pa rekreá parti pafó, a lo largu di e proyekto. Na altura di e edifisio 7, ku ta keda riba Blvd Helm Wiels, aki e asera pa kana rekreá, a bira mas smal.
E desaroyadó a indiká na EXTRA ku ta durante di e trabounan a pone e hèkinan, pa motibu di aspektonan di seguridat. A hala e hèki mas pafó, i asina evitá ku esnan ku ta kana, lo kore rísiko pa ku konstrukshon. Pero ta e intenshon ku e asera ta bai bèk den su estado original, esta su hanchura ku e tabata, den próksimo lunanan. E hèki ku tin ta unu temporal di trabou.
Ta intenshon di e desaroyadó pa pone un hèki mas bunita i ku esnan ku ta kana por wak dor di dje. Ademas lo pone e hèki mas abou i asina no ta limitá e bista di esnan ku ta kana. E desaroyadó ta ekspresá nan diskulpa pa e inkonvinensia ku e trabounan a trese i ta gradisí esnan ku ta usa Koredó pa nan komprendementu i pasenshi.
