Desaster den di tráfiko na Sta.Rosa pió ku nunka

WILLEMSTAD.- Outomobilistanan di área di Banda Riba, spesífikamente tur esnan ku mester pasa den e área entre rotònde na Sta.Rosa i misa di Sta.Rosa mester a eksperensia awe mainta e desaster ku OW a krea den e área ei. Pa basta tempu kaba habitantenan, komersiantenan i tur esnan ku ta trafiká eibanda ta reklamá pero ta opvio ku esnan ku a diseñá i konstruí e desaster ei no ta ni pasa ei banda.

Masha tempu kaba e situashon ta bira unu kaótiko na e área ei i e ta keda asina hinter dia. Na misa di Sta.Rosa pastor mester a tuma medida pa pone pipa i otro artefakto despues di a tuma nota kon outomobilistanan a traha un kaminda di tera patras di e misa pa asina por logra pasa i sigui nan destino.

Ta trata di e área marka den e sirkulo riba e foto esta entre Sta.Rosaweg/katunastraat bai den direkshon west (pabou) te na e rotònde di Sta.Rosa. Na altura di Ritz Sta.Rosa a krea un drèmpel pero e ta sigui bai te Kaya Pita. Tur mainta di djaluna pa djabièrnè por mira kon entre 06:45 i 07:45 ta forma na final di Kaya Pita kuater vehíkulo banda di otro pa Sali for di e kaya pa subi Sta.Rosaweg. Na salida di Cadushistraat pa Sta.Rosaweg tambe ta forma por lo ménos 3 outo banda di otro loke ta pone ku e tráfiko ku ta bini riba Sta.Rosaweg no por drenta Cadushistraat pasobra tin tres outo banda di otro pa sali for di e kaya ei i subi Sta. Rosaweg.

Na Kaya Tuna, ku ta un kaya smal nèt pa un vehíkulo a krea e posibilidat pa un outo drenta i unu Sali. Foto ta mustra un outo chikí ku mester para na e otro banda pa e lora na man drechi manera e bòrchi di tráfiko ta indiká.

Hendenan kreativo ta Sali kas asta prome ku 06:45 i ta krusa den kayanan den Sta.Rosa pa tòg yega Seroe Loraweg i Sta.Rosaweg. A start drechamentu den un di e kayanan prinsipal kaminda hopi outomobilista ta krusa pa evitá e desaster na altura di misa di Sta.Rosa. Einan tin un parti ku ta ‘verboden’ ku algun outomobilista a tuma e mal kustumber di pasa di e parti ei.

Awe mainta polisnan a bai regla e tráfiko i kumpliendo ku lei ta dirigí tur outomobilista pa sigui kore segun direkshon di tráfiko i komo tal awe mainta a tuma entre Toko Pita riba Cadushistraat pa rotònde di Sta. Rosa 65 minüt. Danki na e desaster di ingenieria traha den área di Sta.Rosa. Habitantenan ku mas ku 30 aña biba den e área di Sta. Rosa, Montaña i Jan Thiel ku ta krusa di Sta. Rosaweg sa ku e situashon no tabata asina den pasado. Tráfiko tabata pega na lusnan di tráfiko di Sta.Rosa pero e kambionan solamente a hasi e situashon 100 bia pió. Komportashon di tur esnan den tráfiko ta importante, pero EXTRA mester konstatá ku aki ta e situashon ta pone ku hendenan ku ta nota ku nan ta Sali kas bastante tempran tòg no ta logra i asina ta stimulá mas mal komportashon.

EXTRA a buska i haña kontakto ku bosero di OW sr. Juanipa. E bosero ta splika ku nan no tabata na altura di e desaster den e área. Juanipa ta kere ku komportashon di outomobilistanan ta un problema serio i riba esei EXTRA a mustra ku nos no ta hustifiká e situashon, pero e infrastruktura no ta funshoná i ta kousa mas problema. Tambe el a indiká ku tin adaptashon di kaya, asta ta asina ku tin investigashon ku a hasi kaba di rotònde di Sta.Rosa. Ta bai amplia e rotònde pa yuda e fluho di tráfiko. Tin reklamo di OW ku outomobilistanan ta bai kore den kayanan di bario i aki tambe EXTRA a mustra e bosero ku esei ta lógiko si Sta.Rosaweg e tráfiko no ta kore.

 

SHARE

LEAVE A REPLY