ORANJESTAD.-Polis di Aruba ta informá ku djabièrnè último, 1 Desèmber 2025, a drenta notifikashon den oranan di mèrdia di un aksidente serio ku a tuma lugá, den kua un outo lo a alkansá un peaton na Pastoor Hendrikstraat na San Nicolas. Sentral di polis a dirigí patruya polisial San Nicolas i ambulans.
Na yegada di e promé patruya a bin topa ku un hende hòmber benta riba kaminda, i mesora por a nota ku su situashon tabata mustra hopi kritiko. Ambulans a yega na e sitio i a stabilisá e víktima pa despues bai kuné ku gran urgensia pa hospital. A pèrkurá pa sera e krusadanan importante ku diferente patruya pa asina ambulans por a yega lihé i sigur na hospital.
Spesialistanan di tráfiko i polis tékniko a presentá na e sitio pa hasi nan investigashon. Departamento di Slachtofferhulp tambe a keda informá pa asina brinda asistensia na famia di e víktima.
Djamars anochi a drenta informashon lamentabel ku pa 11:45 pm e víktima di e aksidente a fayesé. Ta trata di e e víktima Vincent Antonio Rohan nase dia 12 sèptèmber 1948 (77 aña) na Aruba. El a bira e di 9 morto den tráfiko pa aña 2025.
Kuerpo Polisial ta manda palabra di kondolensia na e famia. Alabes Kuerpo Polisial kier rekordá ku ta último luna di aña y pa ban trankilo den tráfiko, baha velosidat, kumpli ku reglanan y PAGA BON ATENCION den tráfiko.
