GAZA, PALESTINA (AFP).- Defensa Sivil di e strook di Gaza a bisa ayera di a topa ku alrededor di 60 kadaver bou di edifisionan di Shujaiya, den ost dje siudat di Gaza, despues ku ehérsito israelí a bombardiá e zona.
Despues di mas ku nuebe luna di guera entre Israel i Hamas, djaweps a tene kombersashonnan nobo na Qatar, pais mediadó huntu ku Merka i Egipto, pa purba yega na un akuerdo pa stòp ku e guera i e liberashon di rehennan ku ainda ta den man dje movementu Hamas.
Ehérsito israelí a bisa djárason anochi di a kompletá operashonnan ku el a lansa riba Shujaiya, den nort di Gaza, ku a permití nan destruí ocho tùnel i eliminá “desena di terorista”.
Mohamad Nairi, un habitante di Shujaiya, a regresá su bario den ruina i a duna di konosé ku e destrukshon ta inmenso i “ta superá tur loke por keda deskribí”.’
Despues di retirada dje forsanan israelí, Defensa Sivil dje teritorio palestino a duna di konosé di a topa ku “den kareda di sesenta kadaver”.
Ehérsito israelí djárason a ordená evakuashon dje siudat di Gaza i a atvertié ku e lokalidat ta “un zona peligroso di kombate”.
Por bisa ku 85% dje edifisionan den e bario ya no ta lugá pa hende biba, sin konta tur e infrastruktura ku a keda bombardiá, segun defensa sivil ta bisa den un komunikado.
Ehérsito israelí tambe a indiká ayera di lo sigui ku bombardeo den e zona di Rafah, siudat zùit ku ta na frontera ku Egipto, kaminda ku segun Israel “a eliminá desena di terorista”, entre nan Hasan Abu Kuik, deskribí komo un hefe di seguridat di Hamas.
