CARACAS, VENEZUELA (AFP).- Verifikashon imparsial, konta votonan di nobo, froude. Esei ta algun dje ekspreshonnan ku por skucha despues di e reelekshon di presidente venezolano Nicolás Maduro. Tambe vários lider mundial ta pidiendo transparensia despues di a tuma nota di resultado dje elekshon di djadumingu último.
Outoridat elektoral venezolano ayera di manera ofisial a proklamá presidente Maduro komo ganadó di e elekshon presidensial. Maduro, di su parti, ta denunsiá intento di gòlpi di estado miéntras ku oposishon ta sigur ku nan ta víktima di froude.
“Nan ta purbando pa imponé un gòlpi di estado na Venezuela, di karakter fasista i kontra revolushonario”, segun e presidente iskierdista a denunsiá, despues di su reelekshon pa un di tres mandato di seis aña.
Den kayanan dje pais e insertidumbre ta krese riba e pasonan ku oposishon lo tuma. Oposishon ta liderá pa Maria Corina Machado kende a pusha Edmundo Gonzalez dilanti komo nan kandidato presidensial.
Gobièrnu ta akusá oposishon di ta buska pa destabilisá e pais dor di usa violensia.
E presidente dje konseho elektoral a denunsiá un supuesto intento pa di forma ilegal drenta den e sistema elektoral pa por kambia e resultadonan, i e fiskal general di Venezuela a relashoná Machado komo esun responsabel pa esaki.
Konteo di voto
Merka, klave den e proseso ku a kondusí na e elekshon, i e bisiñanan Brasil i Colombia, e tres paisnan ku a risibí mas tantu migrante venezolano e último añanan, a pone na duda e resultado ku ta duna Maduro un di tres mandato di seis aña pa un total di 51% dje votonan, kontra di 44% di Gonzalez, segun e entidat elektoral.
Sekretario di Estado norteamerikano Anthony Blinken, a ekspresá su “preokupashon serio” pa e resultado despues di a pidi un konteo “hustu i transparente”.
E gobièrnu di Gustavo Petro, promé presidente iskierdista den historia di Colombia i aliado di Maduro, di su parti a pidi “e konteo total di voto, su verifikashon i ouditoria di karakter independiente”.
Brasilia a yama pa un “verifikashon imparsial dje resultadonan”. E presidente chileno, Gabriel Boric a bisa ku e resultadonan ta “difísil pa kere”, miéntras ku Panamá a retirá su personal diplomátiko for di Caracas i a pone “den suspenshon” e relashonnan bilateral
Francia, Spaña i Union Europeo a pidi transparensia total” riba e proseso.
Gobièrnunan di Argentina, Costa Rica, Ecuador, Guatemala, Panamá, Paraguay, Perú, Repúblika Dominikana i Uruguay a eksigí un revishon kompleto di e resultadonan.
