FORT BRAGG, NORTH CAROLINA, MERKA, AP.- Bowe Bergdahl, e sargento ku a bandoná su puesto na Afganistan i provoká un búskeda kaminda algun di su kamaradanan a sufri herida, lo no bai prisòn. Esaki ta konforme sentensia di un hues militar djabièrnè na final di un huisio ku a hala hopi atenshon durante kampaña elektoral.
Bergdahl a wòrdu kaptura pa Taliban i detené durante sinku aña, te ora ku presidente Barack Obama a interkambi’é ku prizoneronan di milisia. Komo kandidato presidensial, Donald Trump a pidi un sanshon severo pa Bergdahl, kende tabata enfrentá bida largu den prisòn.
E hues a sentensia na degradashon di sòldat i pago di 1.000 dòler pa luna durante dies luna. E no a duna komentario riba su desishon. Den Korte, Bergdahl tabata mustra tenso. Su abogadonan tabata bras’é i pasa man riba su lomba.
Luna pasa el a deklará kulpabel di desershon i kondukta inkorekto kontra enemigu. E hues tabatin un márgen amplio pa e sentensia paso Bergdahl no a yega na un akuerdo ku fiskalnan a kambio di deklará kulpabel.
Fiskalnan a pidi un sanshon severo debí na heridanan ku otro sòldatnan ku a busk’e a sufri, na momentu ku el a disparsé na aña 2009. E sentensia aki ta priva Bergdahl di tur òf kasi tur su benefishinan komo veterano di guera.
