Polis ta tene kuenta ku no ta promé bia
WILLEMSTAD.-Manera EXTRA a informa for di den oranan chikí di mardugá, polis i brantwer mester a bai ku urgensia pa un adrès na Sabana Baka, ku ta den área di Porta Blanku. Bosero polisial Imro Zwerwer a informa EXTRA ku sentral di polis a haña e notifikashon 03:11 di mardugá.
Na yegada di e promé unidatnan a topa ku vários trùk i loader/katapila na kandela. Ta un total di 12 vehíkulo pisá Deskonosínan a pega na kandela di kua 11 ta dòmtrùk i 1 ta un katapila/loader.
Den e investigashon preliminar a topa ku 2 jug ku a kontené líkido flamabel. Polis no por bisa na e momentunan aki ta kua tipo di líkido flamabel a usa. Esaki ta duna indikashon fuerte ku tur kos ta indiká ku e kandela aki ta intenshonal. E ekipo ku ta hasi investigashon táktiko a kuminsá ku nan trabounan kaba, awe den transkurso di dia e investigashonnan lo sigui.
Den kombersashon ku e bosero polisial EXTRA a komprondé ku no ta promé bia ku tin un kaso paresido na e kompania Rodricon Transport, komo tal den e investigashon di e kaso aki lo tene kuenta ku e kaso di pasado tambe.
