Deskonosínan a saka kurpa di homber asesiná for di su graf

WILLEMSTAD.- Ayera outoridatnan, fiskal, outoridatnan di ministerio di salubridat i tambe polis a presentá na Parke El Consolador na Brievengat, despues di a risibí informashon ku den oranan di mardugá deskonosínan lo mester a saka restunan di un homber ku resien a keda asesiná i pa despues laga esaki atras den e parke.
EXTRA a tuma kontakto ku bosero di Kuerpo Polisial Reginald Huggins ku a konfirmá ku bèrdat outoridatnan a presentá den oranan di mainta na e parke despues ku nan a risibí e informashon, pero e bosero no ke a duna masha detaye, debí ku e kaso ta unu hopi delikado.
Pero for di fuentenan verídiko i konfiabel EXTRA por a komprondé ku esnan responsabel pa e akto aki a saka e kaha di morto for di e kèlder, pa despues saka e kurpa for di e kaha i laga e restunan djis den banda ei mes.
Tambe EXTRA a komprondé ku ya e kurpa aki a kuminsá putri, i tabata saka un holó hopi fuerte.
Esaki a pone ku despues di a hasi investigashon mesora mester a bolbe dera e kurpa.segun nos a komprondé ku no tabatin señal di akto di bruheria òf ku lo a hasi ‘daño’ na e kurpa.
E tipo di aktonan aki no ta algu komun, pero si personanan sa hasi e akto aki komo unu di bruheria òf simplemente pa manda mensahe pa famianan ku a keda atras loke ku probablemente a pasa den e kaso aki.
Pero outoridatnan ta kontinuá ku investigashonnan.

 

SHARE

LEAVE A REPLY