Carla Martina i Nancy Rodrigues Pereira; Shiftmakers Caribbean
Shiftmakers Caribbean a keda fundá pa Carla Martina i Nancy Rodrigues Pereira. I manera e nòmber mes ta bisa, nan intenshon ta pa trese un kambio/‘shift’ den hende su bida i esei nan ta hasiendo pa medio di entre otro tayernan.
Shiftmakers Caribbean a lanta
Carla Martina, komo fundadó di Shiftmakers Caribbean, ta un profeshonal di Rekurso Humano ku mas di 30 aña di eksperensia. El a traha den e mundu korporativo i pa último e 13 añanan e tin su mes kompania di kònsùltent i guia (‘coaching’) sertifiká, kaminda ta duna ‘training’ i kurso. Tambe Carla a lanta Caribbean Happiness Conference. Durante di e proseso di Caribbean Happiness Conference Carla a sera konosí ku un sera konosí ku yama Myrna Lewis di Sur Afrika i ku ta duna un programa di Lewis Democracy. Ta trata aki di un programa ku ta yuda e hende atendé ku konflikto, solushoná konflikto i inklusividat. E parti di kon ta inkluí hende den bo komunidat/ organisashon pa nan sinti ku nan tambe ta konta. Sra. Myrna Lewis a traha den temporada ku a abolí Apartheid na Sur Afrika i a yuda trese e gruponan étniko ku tabata diversifiká i kontra di otro, huntu. Carla a invitá sra. Lewis un bia pa duna un tayer i den e tayer el a bin ku un sistema di Deep Democracy i einan Carla a mira e posibilidat pa aplik’é na Kòrsou tambe. Den e programa ei e señora ta papia di ‘Shifts’. Pa hasi ‘shift’ riba nivel emoshonal pa asina lidera bo mes mihó i pa tin poder pa solushoná konflikto i inklusividat. Carla a mira e posibilidat pa us’é den organisashonnan pero tambe den komunidat kompleto. Carla ya tabata konos’é i a traha ku Nancy i nan a disidí di hasi algu i a yega na e nòmber di Shiftmakers Caribbean. I nan tabatin algun persona ku nan tabata traha kuné kaba i nan tambe ta forma parti di e organisashon. Ta trata aki di sinku dama i tur ta empresario. Pa nan por bisa ku nan ta hendenan ku tin outorisashon pa traha ku e programa, nan mester a sigui ‘training’nan ‘online’ serka e señora for di Australia, durante di 10 siman largu, pa haña e ‘training’ i asina nan por fasilitá e programa. I asina a lanta Shiftmakers Caribbean ku tin e outoridat pa por usa e programa. Carla a splika ku nan a adaptá e programa na nos sistema aki na Kòrsou pa asina por kuadra den nos sistema i kultura.
Nancy Rodrigues Pereira ta ko fundadó di Shiftmakers Caribbean. Den su kaso e ta fasiná ku bida, e ta stima hende i e gusta mira kambio. Durante di vários aña el a traha komo direktora den un Wellness Spa i despues tabata ora pa e mes hasi un ‘shift’. Durante di mas di 20 aña Nancy a duna ‘training’ na Oropa, den Amérika Latina i Karibe i banda di loke e tabata hasi den Spa, el a inkorporá duna ‘training’ i guia. Den temporada di Covid el a sertifiká komo Happiness Coach i einan e trayektoria a kuminsá. El a mira e kambio ora el a tuma nota ku hopi hende ku tabata bin, tabata hasié pasobra nan ke ta felis i esei ta un derechi di kada hende. Si bo por tuma desishon pa hasi bo bida mihó, ta un oportunidat pa kada un di nos. Tur esei a impulsá Nancy pa hasi un kambio pa su mes, skohe pa su felisidat i sintié mihó. I asina el a kuminsá desaroyá programanan di ‘training’. Huntu ku Carla nan a sertifiká pa Lewis Deep Democracy. Nan a kaba di hasi un sertifikashon di ‘vertrouwens persoon’ esta, e persona di integridat i sigui den e gira ku nan a drenta kaminda por sostené un kompania, organisashon i hende tambe pa nan hasi kambionan pa asina logra nan felisidat. I einan Shiftmakers ta kai aden, e kambio no ta solamente dor di tuma desishonnan pero e kambio ta bin di paden. “Bo mester kuminsá riba bo mes di bèrdat i e resultado di kada un di nos ta bira e totalidat kompleto i impaktá un komunidat”, Nancy a bisa. Dos aña i mei pasá Nancy, huntu ku Carla, a bai un konferensia di felisidat na Merka pa desaroyá nan mes i pa guia tambe. Sintá na aeropuerto nan a yega na e idea pa un programa nobo ku ta 3D leadership. E 3D leadership ta nifiká pa liderá bo mes, liderá un tim i asina bo por liderá i ta un impakto den komunidat. Nan ta konvensí ku si bo no por kambia bo mes, bo no por kambia niun hende i si bo por kambia bo mes lo bo tin efekto rípliko den komunidat. I asina, segun Nancy, nan a kuminsá bati na diferente porta i awor nan tin hendenan ku ta sostené nan manera Cultuur Fonds ku ta pará nan tras. Ku esaki Nancy kier a bisa ku tur kos a kuminsá ku un hende ku kier a hasi kambio pa su mes, dos hende ku a wak otro den kara pa djòin i awor despues di e programa tin kantidat di réplika positivo.
Balor propio i kultivá liderazgo
Shiftmakers Caribbean tin ofisialmente un aña ta eksistí pero e programa i ideanan mes ta kushinando pa dos aña i mei kaba. E interes pa e tayernan ku Shiftmakers ta organisá ta hopi. Nan tin dos aña i mei di preparashon, nan a hasi ‘training’ nan mes i durante di e di tres konferensia di Happiness aña pasá, nan a lansa Shiftmakers Caribbean ofisialmente. Nan a lansa den un sistema ku a duna tayer durante di e konferensia den gruponan mas chikí i kada un di nan ku ta forma Shiftmakers a fasilitá un di e gruponan. Ta un programa ku nan a kuminsá pa fortifiká liderato i tambe balor propio. Esei tabata nan promé proyekto grandi. Despues di e konferensia nan tabatin e proyekto di komunidat ku ta unu Cultuurfonds a kere den dje i a sostené nan kuné. Ennia tambe a sostené e proyekto ei. Asina a lanta e proyekto di Balor propio, kultivá liderazgo i elevá bo balor propio. E proyekto ei a dura 5 luna, kuminsando na yanüari kaminda 40 hende a partisipá. Ta trata di hendenan di komunidat ku a interesá for di momentu ku nan a lanta e programa i a inskribí. E konferensia di Happiness ta na unda tambe a interes a lanta. Durante di sinku luna, un bia pa luna, partí den dos grupo, nan tabata bin huntu na Sentro Multifunshonal Brievengat kaminda tabatin seshonnan. Tabata programanan ku nan mes komo Shiftmaker a desaroyá. Tur luna tabatin un seshon.
Transformashon
E programa di Balor Propio i Kultivá Liderazgo no tabata algu ku ta bai un bia pa luna i siña abilidat. E abilidat ei si bo siñ’é. Lo bo no sa kiko abo mes komo persona mester pa domin’é. E hende mester bira konsiente ken e ta i unda e mester desaroyá den su mes pa asina por desaroyá un abilidat. Kiko e tayernan aki ta kontené: durante di e seshonnan lo atendé e parti di abilidatnan komo persona konosé bo mes, ken bo ta lòs for di e ròl di kiko bo ta hasi i kiko bo tin. A traves di tayer i ehersisio ta bai mas profundo den bo mes. Den e di dos seshon ta atendé tur loke tin di aber ku e persona i su emoshonnan i ta splika kiko ta emoshon, kiko ta sintimentu, kon por usa e sentimentu ei komo formanan pa bo sa kua desishon mester tuma. I asina ta bai den ehersisionan i kiko liderazgo propio ta nifiká. I si bo ke ta lider kiko ta nifiká duna liderato na un tim. I asina ta sigui ku e partisipante ku ora e por liderá un tim, kiko ta nifiká propósito propio. I na final ta sera kon e persona por ta un impakto pa su komunidat. Den e desaroyo total ei nan ta haña ‘coaching’ i esaki ta personal ku ta guianan durante e proseso di 5 luna, kon nan ta re-deskubrí i konektá ku nan mes. Banda di e seshonnan den grupo, ta wak si enberdat tin transformashon personal tambe. Un mente/hende ku ekspandé, nunka mas lo bai ta meskos. E hende ku tuma e desishon ku e ke, nan lo bai den un transformashon ku hamas hende por kita for di nan. E transformashon ei ta pone ku nan ta tuma desishonnan pa nan mes.
Hende konosé tiki di su mes profundidat
Loke a resaltá ora a hasi e ehersisio di propósito den e grupo di 40 hende, a nota ku tabata difísil pa hende yega na deskubrí kiko ta nan propósito. I despues di a hasi e ehersisio, e hende mes no por a kere ku ta esei tabata su propósito. Unabes nan deskubrí e propósito no a keda nada mas pa realisá pa traha pa yega na e propósito ei. I ora deskubrí propósito ta yega na e forsa pa logra. E hende mes ta siña su mes kon nan ta nan mes pa logra e propósito. Nò, nada nada eksterno pero kon nan ta komprendé nan mes, ta konsiente di nan abilidat i forsa interno pa logra e propósito. I esaki ta e ‘shift’ ku e hende ta hasi. Tambe tabata interesante p’e mira kuantu e hende ke, pero kon tiki e konosé di su propio profundidat emoshonal. Einan tin un gèp den nos formashon kaminda ta esensial pa e hende haña mas konosementu kiko ta sentimentu, emoshon i kon por nombra ku ora bo ta rabiá ta rabiá bo ta i ora bo ta tristu ta tristu bo ta pasobra kada un tin un impakto diferente riba e transformashon i para pa bo mes. Por a mira den e partisipantenan hendenan poderoso ku gran kapasidat, gran liderazgo pero komo nan no konosé nan mes, nan no sa kiko pa hasi. Einan por mira kon por yuda un hende pa e balor, a respetá i stima su mes mihó sin kompará su mes ku otro. I tur esaki tin hopi di aber ku sikologia i manera Nancy a bisa ku komo sikólogo el a hinka hopi di e efekto ei tambe den dje, meskos ku Carla saliendo for di su ‘background’ di HR a hinka hopi pa e hende ta mihó. I huntu ku e otro ‘shifter’nan, manera un kulturista, nan kada un a pone nan granito pa krea e programa akí.
Dirigí pa lidernan
Lidernan den komunidat, hendenan ku ta traha ku hóbennan, hendenan ku ta traha ku adultonan ta esnan ideal pa e programa. E hende mester por konosé su mes pa e por yuda otronan. E hende mester deskubrí su mes i asina ta ‘shift’. E eksperensia di e transformashon propio, e hende ku a partisipá den e programa por pas’é over pa otronan. Nan tabatin lidernan di hóbennan di den bario, nan a traha hopi di aserka ku Sefba pa asina por a usa e sentro multifunshonal Brievengat i lidernan di bario a partisipá. Nan a enfoká hopi riba hendenan ku ta traha den komunidat i hopi bia nan no por pag’é. I p’esei a konsentrá riba e hendenan ei. Tambe lo bai enfoká riba empresarionan. Tin empresario chikí ku hopi bia no ta haña e oportunidat i no por paga un programa asina pa nan desaroyá nan mes. Komo Shiftmakers ta haña kontribushon, nan ta pidi algu chikí, ta djis pa e hende sinti e balor pa partisipá den e seshonnan.
Un resultado bunita
Shiftmakers ta haña fondo parsialmente pero e ta mas un trabou boluntario. Nan tur for di nan mes disiplina ta sinta huntu i desaroyá un programa. E ta un satisfakshon di mira e resultado kon e hende a krese i desaroyá. No tin nada mas bunita ku esei! E grupo ku a kaba di terminá e seshonnan di 5 luna a pidi pa un kontinuashon i Shiftmakers Caribbean ta trahando ariba. E grupo akí mes ta rekomendá otronan i p’esei nan tin hendenan pará den rei pa por tuma parti na e programa. Nan ta mira e nesesidat i ta mira unda komunidat por hasi mas i krea mas oportunidat. Nan ta buska e gèp di e hendenan ku no por pag’é i komo nan ta den liderazgo ta duna nan un oportunidat pa desaroyá. E hende por impaktá i si por duna nan mas ‘tools’ pa logra, bo ta logra traha un fundeshi firme.
Un hende di konfiansa i integridat na trabou
Shiftmakers ta bai konsentrá awor riba un programa pa un organisashon privá ku a pidi pa nan lidernan i un grupo nobo ku lo kuminsá na yanüari 2027. I banda di esaki tin mas programa ku ta kanando manera esun di Wellbeing at Work pa kompanianan pa nan elevá e bienestar na trabou. E último ei no ta kai bou di Shiftmakers Caribbean pero e ta konsentrá riba e hende den trabou, unda e por siña konosé su mes mihó, siña konosé su sentimentunan, pa e ta felis. Ora e hende sa ken e ta i ta sinti su mes mihó, e por duna mas na e kompania. Asina ta krea diferente aspekto komo persona di konfiansa ku si e hende no ta sintié bon, pa e tin un hende di integridat i konfiansa pa papia kuné. I den e totalidat ei hopi bia tin apsentismo grandi. Hopi kompania ta lucha ku e hende ta bira malu i no ta bin trabou i den hopi okashon no ta malesa físiko pero kosnan ku ta molestiá, kosnan ku no a keda solushoná i den e kaso ei nan por yuda transformá pa e hende por integrá bèk den trabou.
Hende hòmber mester haña oportunidat pa djòin
Ora tira un bista riba e partisipashon den e tayernan por ripará ku tin mas tantu hende muhé ku ta partisipá. E hende muhé tin mas kurashi pa relatá su mes na ken e ta, kua su sentimentunan ta i bai profundo den e ser. Ainda falta un desaroyo pa e hende hòmber aunke ora haña hende hòmber partisipá, nan ta tuma esaki hopi na serio i bai profundo. No ta kuestion ku e hende hòmber no tin interes sino mas bien ta algu nobo i nan mester haña e oportunidat di djòin i reforsá esei. E hende muhé tin un realidat ku tin mas mucha muhé ta studia mas den direkshon di liderato i mas hende muhé ta studiando i transformando i trahando riba nan mes.
Un palabra di estímulo pa nos hende hòmbernan
Carla: “Kaminda nos a topa e hende hòmbernan mas tantu ta ora nos tin programa den kompanianan pasobra nan ta parti di e empleadonan. E loke nos ta eksperensiá ku e hende hòmber ta pasa aden ta meskos ku e hende muhé. Nan tambe tin emoshon, mester rekonosé nan emoshonnan i esaki ta yuda e hende hòmber tambe den nan trabou, den bida privá. E hende hòmber no ta papia di su emoshonnan fásil pero ta importante pa nan tambe desaroyá. Un invitashon pa e hende hòmber bin. Nos tin e espasio ‘safe’ i sigur pa e hende hòmber papia di su emoshon”.
Nancy: “Bo ta di balor. Nos t’ei pa skucha i nos ta skucha ku kurason habrí. Meskos ku e hende muhé a desaroyá su mes ta importante pa e hende hòmber tambe desaroyá su mes Den harmonia nos ta un i kompleto. Ta importante pa e muhé i hòmber konosé nan mes i sa nan impakto. Mester kibra e tabú i esaki ta pa e hende hòmber i pa e muhé. Hòmber lanta para i mustra nan balor”.
Ora bo ta felis tur kos rondó di bo ta floresé. E stap di liderazgo ta esun ku nos tur tin di tuma pa hasi nos bida mas ‘safe’. E amor propio ta un transformashon profundo. Nos ta lubidá nos mes i ora bo deskubrí esei no tin nada mas bunita. Siña stima bo mes! Shiftmakers ta alkansabel na +5999 5230939
