WILLEMSTAD.- Konseho Supremo Elektoral a tuma despedida di presidente i presidente suplente respektivamente Raymond “Pacheco” Römer i Charles do Rego. E despedida a konta ku presensia entre otro di gobernadó sra. Lucille George-Wout i tambe presidente di Korte sr. Maurits de Kort. Ayera 10 di òktober a kumpli nèt 2 aña di Konseho Supremo Elektoral independisá.
Konseho Supremo Elektoral tin e responsabilidat legal pa organisá e proseso elektoral i ehekushon korekto di e Reglamento Elektoral di Kòrsou. Alabes implementashon di e ordenansa ku ta regardá finansiamentu di agrupashonnan polítiko i tambe hasi empeño pa e siudadano bira mas konsiente di e proseso elektoral.
Entrante 10 di òktober 2022, temporada di e miembronan di Konseho Supremo Elektoral ku a inisiá e trayekto na òktober 2020, ta yega su fin manera lei a preskribí. Esaki ta pone ku mester bini miembronan nobo nombrá segun prosedura i kriterionan definí i akordá den un landsbesluit. Sinembargo, e trayektoria aki ta unu ku ta eksigí hopi trabou i no a logra e Konseho pa finalisá esaki promé ku 10 di òktober 2022. Konsekuensia di e tardansa aki ta ku algun miembro aktual lo sigui pa un temporada di maksimalmente 6 luna komo miembronan temporal sperando ku e trayekto pa yega na solisitut pa miembronan nobo di forma ofisial por finalisá.
Sinembargo tin dos miembro ku no por sigui, pa motibu ku lei ta preskribí un máksimo di edat ku un persona por ta miembro di e Konseho. Ta trata di Raymond “Pacheco” Römer i Charles do Rego ku ta respektivamente presidente i presidente suplente aktual di KSE.
I den e kuadro aki den wikènt tabatin despedida pa nan dos. Na e okashon aki kada un a haña un rekuerdo, ku ta un kolazje di potrèt, e potrètnan ku sigur ta trese rekuerdonan bunita serka nan, di e trabou balioso ku nan a hasi komo presidente i presidente suplente.
Nos di EXTRA tambe ta deseá tantu sr. Römer komo sr. do Rego tur kos bon i danki pa e trabou balioso pa komunidat.
