Destrukshon na edifisio ontvanger ta mas grandi ku hopi ta kere

WILLEMSTAD.- E destrukshon ku e edifisio di ontvanger a sufri riba e anochi di 22 di ougùstùs ta muchu mas grandi ku hopi hende ta pensa. I segun EXTRA su informantenan, apesar ku ke pa kos sigui normal, esaki ainda no por. Mayoria trahadó di ontvanger ta na kas ainda pasobra no tin un lugá pa nan por bai hasi nan trabou ainda.

Ayera nos a tira un bista banda di e edifisio di ontvanger i nos a spanta.

E eksploshon den e edifisio di ontvanger tabata asina fuerte ku e parti paden, e parti pa sùit a keda praktikamente kompleto destruí.

EXTRA a ripara ayera ku porta di e edifisio tabata habri, no tabatin seguridat na porta i kualke hende por drenta i Sali manera nan ke. Nos fotograf a para na porta yama pa e por a haña chèns di drenta, pero niun reakshon. No tabatin lent di polis ni bewaker na e porta dilanti miéntras ku e kaya dilanti di ontvanger ta habri bek i BAB tambe a kuminsá duna servisio na klientenan.

Nos fotograf a drenta i a saka algun potrèt i ta ora e tabata saliendo un persona a bin di leu bisé ku e no mester a drenta pasobra eiden tin basta kos konfidensial i ta peligroso. E persona no kier a bisa ta ken e ta. Pero loke EXTRA por a tuma nota ta ku kualke hende por a drenta e edifisio i Sali, sin ku ni ripara ku nan a drenta.

Riba e kombinashon di fotonan aki un bista di parti paden pero tambe di e parti sùit di e edifisio kaminda tabatin e eksploshon.

Manera nos a relatá anteriormente, e kaso aki ta unu basta grandi i asta mester a hiba e sospechoso ku tin detené Boneiru pa ser’e, esaki pa su propio seguridat.

Mas aleu mester menshoná ku tin 4 trahadó di ontvanger ku ta keda investigá aktualmente pa posibel kosnan ilegal ku a sosodé ku dokumentonan di impuesto. Tin sierto servisio di ontvanger ku ta keda duna entre otro na sitionan manera Inspekshon di Impuesto a habri un ofisina na WTC pa atende deklarashon di entrada pa mayornan ku tin yu ku ta studia ku beka di DUO. Mayornan mester presentá ku kopia di e ’aangiftebiljet’ 2017 òf 2018 ku a entregá online. Personanan ku bin entregá un deklarashon de entrada di tersera persona, mester presentá ku un apoderashon.  Komo e sistema di kòmpüter no ta asesibel ahinda, lo yena e formularionan por lo pronto na man.

E ofisina kaminda ta atende deklarashon di entrada pa mayor ku yu ku ta studia ku beka di DUO ta keda  den e filial bieu di MCB na WTC na Piscadera. Oranan di ofisina ta di 08.00 te ku 11.30’or i di 14.00 pa 15.30’or.

 

SHARE

LEAVE A REPLY