WILLEMSTAD.- Outoridatnan polisial a detené kuater persona ku den oranan di mardugá a kue tres brantspùit di Refineria Isla i tambe un trèker. E personanan ta detené ketu bai, asina bosero polisial Imro Zwerwer a duna di konosé na EXTRA.
E trahadónan di Refineria Isla huntu ku diferente otro sektor ta den un wèlga kombiná ku protesta pa vários rason. Un di e puntonan ta e yudansa humanitario na Venezuela ku Kòrsou a bai di akuerdo pa partisipá na dje.
Zwerwer a indiká ku no tin muchu detaye kon kosnan a pasa, pero echo ta ku e kuater suhetonan a tuma poder riba e 4 vehíkulonan riba tereno di isla i mas lat a topa ku e vehíkulonan, kada un riba tereno di Isla mes. Pues nan no a logra saka e vehíkulonan for di e tereno di Isla. Banda di e echo ku a detené e 4 suhetonan a konfiská 3 vehíkulo tambe. Tin indikashon ku ta trata di trahadónan den akshon ku na nan manera a trata na duna nan parti. Un lider sindikal a deklará den oranan di mainta ku lo bai buska informashon di e kaso pa wak si ta logra papia ku outoridatnan pa laga e 4 hendenan den libertat. Ta konsiderá ku ta e situashon di tenshon lo a pone ku hendenan ta kuminsá aktua di forma deskabeyá, pero ei mes e dirigente sindikal ta mustra ku e orígen ta e echo ku ta luchando hopi dia anto gobièrnu no ta respondiendo korektamente.
