Rodrigo Cabezas, èks-minister di finansa di Venezuela.
CARACAS (AFP).- E èks-minister di finansa dje defuntu èks presidente venezolano Hugo Chávez (1999-2013), Rodrigo Cabezas, a keda detené ayera na Venezuela, segun su yu Rodna Cabezas a duna di konosé. Mas aleu un organisashon di derechinan humano a denunsiá aresto di tres analista ekonómiko, sin revelá nan identidat.
Te ku ayera nochi no tabata sa e motibu di e detenshonnan, tampoko si entre e tres ekonomistanan detené ta figurá Cabezas.
“Mi tata a keda arestá djaweps 21 di yüni na Maracaibo kaminda e ta biba. E no a keda presentá, nos no sa di kiko e ta keda akusá”, segun Rodna Cabezas a bisa na AFP.
“Komo su yu mi ke sa na unda e ta, pa mi mir’é. “E tin problema ku kurason ku ta rekerí tratamentu, e mester bebe remedi tur dia pa hipertenshon”, segun e yu a agregá.
Cabezas, di 69 aña, outo proklamá komo “chavista pa semper”, tabata minister di Chavez entre 2007 i 2008 i diputado dje gobernante Partido Socialista Unido de Venezuela
(PSUV), pero den e último añanan el a tuma distansia dje organisashon despues di a kritiká e presidente aktual Nicolas Maduro.
Tokante e detenshon di ekonomistanan no tin detaye. “Loke nos sa, ku tin tres ekonomista prezu”, di akuerdo ku Marino Alvarado, miembro di PROVEA den un konferensia di prensa.
