CARACAS, VENEZUELA (AFP).- Ministerio Públiko venezolano a ordená detenshon di kuater kolaborador dje prinsipal rival di presidente Nicolás Maduro den elekshonnan di 28 di yüli, akusando esakinan di “lantamentu di odio”.

E kandidato presidensial opositor Edmundo González Urrutia a denunsiá e “inhabilitashon polítiko” di 10 alkalde ku a manifestá nan apoyo na su kandidatura.

E fiskal general, Tarek William Saab, a informá riba e ret sosial X ku Luis López, Juan Iriarte, Jean Carlos Rivas i Ismael González a keda “arestá i privá di libertat pa delitonan di krea odio”. Otro dos persona, tambe miembronan dje komando di kampaña opositor, a keda solisitá pa hustisia pa e mesun delitonan.

Segun Saab, durante un akto di kampaña den La Guaira na kuminsamentu di yüni, e akusadonan “a dirigí na mes di forma agresivo na e Komando di Guardia Nashonal Bolivariana kaminda nan a purba drenta hasiendo uso di forsa ku e intenshon pa leshoná e efektivonan”.

Oposishon a denunsiá ku e outoridatnan no a informá e lugá di detenshon di e militantenan i ku a presentá nan den korte sin presensia di nan abogadonan di konfiansa.

Gonzalez Urrutia poko despues a duna di konosé ku 10 alkalde, ocho den e estado andino di Trujillo i otro dos di Nueva Esparta a keda detené “inhustamente pa motibu di ta apoyá nos kandidatura”.

“E persekushon kresiente ta konfirmá ku Venezuela a disidí pa un kambio i lo ekspresá esei ku determinashon dia 28 di yüli. Nos lo sigui lucha pa un pais kaminda ningun hende ta keda persiguí pa motibu di ta pensa diferente”, segun e embahador, deskonosí te ora ku el a keda nominá ku apoyo dje lider Maria Corina Machado.

E lider opositor a duna di konosé ku sigur 37 dirigente i lidernan polítiko yegá na su kampaña a keda detené e aña’ki. El a denunsiá “persekushon i kriminalisashon di e aktividat elektoral”, miéntras ku gobièrnu ta akusá oposishon di konspirá pa deroká e aktual presidente.

LAGA UN KOMENTARIO

Please enter your comment!
Please enter your name here