WILLEMSTAD.- Entre djaweps i djabièrnè polis a detené sigur dos persona relashoná ku menasa, violensia relashonal i destrukshon. Ta trata di dos hòmber, unu di 44 aña i e otro di 28 aña.
Polis ta informá ku djaweps anochi, kasi 12 or Sentral di polis a dirigí un unidat polisial pa un kas na Commandeursweg pa un kaso di menasa i violensia relashonal.
For di investigashon ku polis a hasi na e sitio a sali na kla ku despues di un problema entre un pareha, esaki a terminá den menasa i maltrato.
Na e sitio polis a detené e hòmber D.A.V. di 44 aña di edat nasé na Hulanda, enkonekshon ku e kaso ariba menshoná. A presentá e sospechoso dilanti di un fiskal ouksiliar ku a ordená nan enkarselamentu pendiente di mas investigashon.
E otro detenshon tabata bièrnèsantu dia 18 di aprel den kareda di 10 pasa di 6 di mainta. Polis ta informá ku nan a keda dirigí pa un un kaso di destrukshon, ladronisia i subi riba tereno di otro sin pèrmit.
For di investigashon preliminar ku polis a hasi na e sitio a sali na kla ku un hòmber konosí pa e famia pa basta dia kaba tabatin un problema familiar. E hòmber tabata tira piedra i kometé destrukshon na e kas aki. Finalmente el a subi riba tereno di e kas i kòrta waya di koriente bai kuné.
Despues di un búskeda den e área polis a detené e hòmber L.A.J. nasé na Kòrsou di 28 aña di edat, enkonekshon ku e kaso ariba menshoná. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
