Pa minister Silvania
WLLEMSTAD.- Minister di Finansa, Javier Silvania den ménos ku 3 aña ta hasi 5 bishita di trabou na Malta den kuadro di kambionan ku ke trese den e sektor di “online gambling” i e proposishon di lei LOK (Landsverordening Online Kansspelen”). E kantidat di biahenan aki ta notabel i tambe e echo ku kada be e minister ta bai ku un delegashon amplio Malta.
E biahenan di trabou pa Malta ta lòs for di otro bishitanan di trabou ku e minister a hasi na por ehèmpel, London, Inglatera tambe den kuadro di “online gambling”. E promé bishita di Silvania na Malta tabata di 4 pa 6 sèptèmber pa e bai papia ku spesialistanan i stakeholder den e sektor aki.
E siguiente bishita di Silvania na malta tabata di 12 te 20 novèmber 2022. E minister a partisipá na e konferensia di SiGMA den kuadro di e lei nobo di LOK ku ta trahando riba dje.
Na yüni 2023, esta di 17 pa 24 di yüni Silvania a bolbe hasi un bishita di trabou na Malta. E biaha aki el a bai partisipá na e konferensia “iGaming Next” atrobe den kuadro di e lei di LOK e ta trahando riba dje.
Na novèmber 2023 Silvania pa di 2 biaha e aña ei ta biaha pa Malta. Di 10 pa 19 novèmber el a partisipá un biaha mas na e konferensia di SiGMA.
Aworakí e minister a biaha un biaha mas pa Malta, di 10 pa 18 mei pa bolbe partisipá na e konferensia “iGaming Next”. Ketu bai motibu pa e biahenan di trabou aki ta e lei di LOK.
Parlamento den siman tras di lomba durante un reunion di Komishon Sentral a trata e proposishon di lei di LOK. Minister a kontestá pregunta di parlamentarionan den e promé reunion di Komishon Sentral i alabes a hasi kambio den e konsepto di lei a base di konsehonan risibí i remarkenan di parlamento.
Tambe den siman tras di lomba parlamento tabatin un reunion tékniko ku abogadonan ku ta tambe tin opheshon kontra e konsepto di lei. Orden di Abogado ta di opinion ku mester skrap e kondishon stipulá den e lei ku abogadonan ku ta duna servisio na kompanianan di “online gambling” mester pidi un sertifikado serka Curaçao Gaming Authority (CGA).
Tin opheshon serio kontra loke ta stipulá den artíkulo 15.7 insiso 1 di e konsepto di lei di LOK ku ta na parlamento. For di 2023 e órden di abogado a reklamá ku den e konsepto di lei di LOK ta introdusí akreditashon obligatorio pa abogadonan.
Despues di esaki minister di Finansa a kambia e teksto di e lei i ta referí awor na “sertifikashon” boluntario. E sertifikashon aki ta mará na algun kondishon.
Esun ku ta pidi pa haña sertifikashon mester disponé di e konosementu, eksperensia i kalidatnan pa ofresé servisio òf produktonan pa kua ta pidi un sertifikado. CGA por determiná kriterionan adishonal pa loke ta e konosementu, eksperensia, kalidat i reportahenan pa ofresé servisio òf produktonan pa kual ta pidi un sertifikado pe.
Ku otro palabra esun ku ta pidi un sertifikado ta someté na supervishon di parti di CGA a base di e kondishonnan ku tin òf ku por stipulá despues a base di maneho ku ta pone pa bini na remarke pa un sertifikado.
Abogadonan sinembargo ta kai kaba bou di supervishon di Korte Komun, Hunta di Supervishon riba Abogasia (“Raad van Toezicht op de Advocatuur”) i Hunta di Apelashon riba Abogasia (“Raad van Appèl op de Advocatuur”). Segun Orden di Abogado e supervishon aki ta funshoná bon.
“Supervishon di CGA riba abogadonan ku un sertifikado no ta nesesario i lo por krusa e supervishon eksistente. Kon CGA ta disidí riba abogadonan ku Hunta di Supervishon a tuma un medida kontra dje? Kontrali, Hunta di Supervishon mester tene kuenta ku desishonnan di CGA riba abogadonan?”
Tambe órden di abogado ta puntra su mes si mester tin kordinashon entre e diferente supervisornan. “Si e kontesta ta si, mester sòru ku tin sierto garantianan den e kordinashon aki. E konsepto di lei di LOK no ta stipulá nada riba esaki.”
Orden di Abogado ta yega pues na e konklushon ku sertifikashon di abogadonan ta krea desigualdat bou di abogadonan ku ta hasi e mesun trabou. E ta impliká ku un abogado ku un sertifikado ya kualitativamente mihó ku un abogado sin sertifikado. Un otro efekto por ta ku abogadonan sin sertifikado ta haña ménos trabou.
