QUITO (AFP).- E alkalde di un siudat minero den zùit di Ecuador a keda asesiná, segun polis a informá, den loke a bira e di dos homisidio di un máksimo outoridat di munisipio den tres dia. Esaki a tuma lugá na víspera di referendum di djadumingu próksimo riba reformanan pa enfrentá krímen organisá.

E alkalde, Jorge Maldonado, tabata víktima di tirunan i a bira e di  dos alkalde pa keda asesiná e siman aki. E promé tabata José Sanchez, dje munisipio Camilo Ponce Enriquez.

Den luna di mart nan a tira Brigite Garcia, alkaldesa di San Vicente (wèst) i e outoridat munisipal di mas hóben elegí den elekshonnan di 2023. E tambe a muri.

For di yanüari di 2023, por lo ménos un dozein di polítiko a keda asesiná den Ecuador. E kaso ku mas a hala atenshon tabata di Fernando Villavicencio, asesiná den luna di ougùstùs pa sikarionan kolombiano ora ku el a sali un evento di kampaña ku bista riba elekshonnan antisipá dje aña ei.

Polis a bisa ku Maldonado a keda asesiná miéntras e tabata kumpliendo ku aktividatnan personal, den un bario di Portovelo. “E asesinato tabata na man di dos tipo a-sosial, kendenan a move riba un bròmer”, segun a bisa mas aleu.

Ekuatorianonan djadumingu awor lo bai urna pa disidí den un referèndum motivá pa e presidente Daniel Noboa, pa  pueblo tuma desishon si ta bin ku kondena mas fuerte kontra di krímen organisá i si ta aprobá ekstradishon.

Ecuador, ubiká entre Colombia i Perú e produktornan mundial mas grandi di kokaina pa algun aña kaba no ta un pais di pas sino un punto stratégiko pa bandanan ligá ku narkotráfiko, kendenan ta imponé  un régimen di teror den e pais.

LAGA UN KOMENTARIO

Please enter your comment!
Please enter your name here