WILLEMSTAD.- Den algu mas ku un luna ya outoridatnan a realisá di dos detenshon relashoná ku asesinato di e hóben Genciël Recbel Joshua Feller ku a tuma lugá dia 2 di Sèptèmber último riba Caracasbaaiweg.
Ayera mainta alrededor di binti pa diesun, Tim di Aresto a detené e hòmber sospechoso A.A.J., nasé na Kòrsou di 23 aña di edat, relashoná ku e kaso riba menshoná. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon. Investigashon den e kaso aki ta kontinuá.
Anteriormente dia 15 di òktober último den oranan di mainta e tim investigativo di e Departamentu di Krímen Organisá a realisá e promé detenshon di e hòmber sospechoso, I.A. nasé na Kòrsou di 29 aña di edat. Relashoná ku esaki e tim a tene entrada hudisial na dos adrès; 1. Kaya Falcon i 2. Un kompleho di apartamentu riba Seru Fortunaweg. Durante e entrada hudisial polis a konfiská vários artíkulo ku ta di importansia pa e investigashon.
Riba e dia en kuestion di e krimen ku sentral di Polis a risibí yamada di e kaso di tiramentu ku a tuma lugá. E promé unidat polisial ku a yega na e sitio, a topa un hòmber sintá den un outo ku algun herida di bala na parti ariba di su kurpa i no tabata duna señal di bida.
A pidi presensia di ambulans, pero na nan yegada, e personal aki no por a hasi nada mas pa e víktima.
Segun vershon di testigunan, dos hòmber a yega na e sitio i a kuminsá lòs tirunan dirigí riba e hòmber ku tabata sintá na e banda di pasahero den outo. For di video di kámara di seguridat di un establesimentu den serkania, por a mira klaramente ku e hòmbernan tabata kara tapá i tabatin blusa blanku i e otro blusa koló kòrá bistí. Tur dos a bini for di e mesun direkshon pero unu a enfrentá e hòmber di dilanti i e otro di patras.
E outo kual tabata manehá pa un dama den kua e víktima tabata sintá aden komo okupante, tabatin vários perforashon di bala. Despues di nan akto, e sospechosonan a bandoná e sitio, te asina leu ku tabata visibel, na pia. Dòkter di polis ku a yega na e sitio a konstatá morto di e hòmber Genciël Recbel Joshua Feller, nasé na Hulanda 3 di novèmber 1995. Pues un hóben di apénas 23 aña di edat.
