WILLEMSTAD.- Djadumingu 17 di mei próksimo, Kòrsou lo bira un biaha mas sentro di elegansia, motosiklismo i solidaridat ku e di kuater edishon lokal di The Distinguished Gentleman’s Ride (DGR), un movementu internashonal ku ta reuní motosiklista ku motornan klásiko i “vintage” pa krea konsenshi tokante salú di hende hòmbernan.
Fundá na aña 2012 na Sydney, Australia, pa Mark Hawwa, The Distinguished Gentleman’s Ride a nase ku e vishon di reuní motosiklistanan nechi i elegante bistí ku estilo klásiko pa promové i apoyá un proseso ku ta insentivá investigashon i programanan importante relashoná ku kanser di prostat i salú mental di hende hòmbernan.
Aworakí, kanser di prostat ta un di e motibunan prinsipal di morto di hende hòmber na mundu, ademas ku problemanan di salú mental ta sigui afektá hopi mion di hende i mester mas atenshon, diálogo i apoyo. Dor di e evento global aki, DGR ta buska krea mas konsenshi rònt di e temanan importante aki i stimulá kuido kompleto pa salú mental di hende hòmbernan.
For di su fundashon, e movementu aki a logra reuní mas ku 500,000 partisipante na mas di 120 pais i a logra rekoudá mas ku 60 mion dòler amerikano pa apoyá programanan di salú maskulino na tur parti di mundu.
E organisashon na Kòrsou ta invitá tur motosiklista ku tin motornan klásiko, ‘vintage, café racers, bobbers, scramblers’ òf motornan ku estilo ‘retro’ pa bira parti di e eksperensia úniko aki di kompañerismo i propósito sosial i solidario.
E salida ofishal lo ta for di Corendon Mangrove Beach Resort. Durante e ruta lo tin un parada spesial na Papagayo Beach Resort promé ku sigui ku e rekorido dor di diferente parti di nos isla. Yegada ta planifiká pa 6:00 di atardi na Wild Hogs Nest, na Hanchi Snoa, Punda, kaminda e selebrashon lo sigui ku músika LIVE di “Rashida & The Stage Rebels”. Henter komunidat ta kordialmente invitá pa kompaña nos i disfrutá di e evento spesial aki.
Pa mas informashon, registrashon pa partisipá òf pa hasi un donashon, bishitá:
The Distinguished Gentleman’s Ride
