WILLEMSTAD.- Wintertuin Kids Festival ta wak bèk riba un edishon ‘sold-out’, magnífiko. Sentenáres di mucha i nan mayornan a disfrutá di un atardi yen di kreatividat, moveshon i inspirashon na un lugá nobo ku tabata un éksito grandi serka bishitantenan.
Reakshonnan riba e lokalidat nobo tabata sumamente positivo. Bishitantenan a elogiá e ambiente fresku, abundansia di espasio, un organisashon ‘safe’ kaminda muchanan por a move rònt sin problema. E aña akí, e organisashon a pone énfasis èkstra riba elementonan interaktivo, ku tabatin un bon akohida. Bishitantenan a indiká di tabata kontentu Wintertuin Kids Festival a krea un espasio kaminda muchanan por move liber i ekspresá nan mes kreativamente hinter atardi. E organisashonnan partisipante tambe tabata entusiasmá; hopi a indiká mesora di loke partisipá atrobe e siguiente biaha.
Mas ku 15 aktividat interaktivo i hopi obranan di arte
Muchanan a disfrutá di e mas ku 15 aktividatnan variá riba e tereno. E bishitantenan hóben tabatin un dushi atardi trahando joyanan di kralchi kolorido, diseñá nan mes kortinanan, i lagando mensahe i ideanan riba e ‘writing wall’. Tambe tabatin diferente espasio paden kaminda muchanan por ehèmpel por baila na nan antoho den un diskoteka kolorido i partisipá na weganan deportivo manera un kompetensia di ‘trèfbal’.
Un di e aktividatnan ku a atraé hopi interes tabata ‘station’ kaminda por a krea obranan di arte i mustra esaki den un eksposishon kombiná, ku e tema di ‘Movishon’. E aktividat akí tabata sumamente popular bou di e muchanan i a resultá den un partisipashon impreshonante: un kreashon di mas ku 100 obra di arte úniko durante henter e atardi, ku tur mucha por a hiba kas na final.
Pasabokanan saludabel i espektákulo riba e tarima den airu liber
Un selekshon amplio di ko’i kome i bebe tambe no a keda afó. E opshonnan saludabel riba e tereno, manera ‘yoghurt bowl’ fresku i salada di fruta a kai den bon tera spesialmente serka mayornan.
E tarima den airu liber, por a konta ku diferente presentashonnan ku a sigui un tras di otro. Un sorpresa grandi i agradabel tabata e presentashon di Rais Rítmiko: un proyekto musikal di Wintertuin Curaçao den kua muchanan di vários skol a siña toka i kanta músika krioyo manera seú i muzik di zumbi. E músikonan yòn a hinka e tereno kompletu den un euforia i dushi ambiente kultural. Algu impreshonante mirando ku nan a siña toka e instrumèntnan akí solamente den tres luna.
Festival di Wintertuin pa Adulto
Pa esnan ku a pèrdè e Kids Festival òf a gusta ku e ambiente, Wintertuin Festival pa Adulto lo tuma lugá dia 19 di sèptèmber na Landhuis Vredenberg. Pa evitá desepshon di no a haña karchi pa a eksperensiá e Kids Festival, e organisashon ta supliká un i tur pa kumpra karchi na tempu, ya k’e chèns ta grandi ku e evento akí tambe lo por ‘sold out’.
Karchinan pa e Festival pa Adulto ta na benta na Caribbean Ticket Shop, Mensings Caminada, i Van den Tweel Supermarket. Wak pa bo no keda afó.
Riba e kombinashon di potrètnan un bista di e Wintertuin Kids Festival di djasabra pasá.
