Partidonan sintá ayera na mesa riba e promé dia dje di dos buèlta di kombersashon tripartit entre delegashonnan di Rusia, Ukrania i Merka na Abu Dabi, ku e meta pa pone fin na e guera Entre Rusia i Ukrania.
MOSKU, Rusia (AFP).- E di tres buèlta pa pone fin na e guera entre Rusia i Ukrania lo por tuma lugá “pronto”, ounke te ku ayera no tabatin fecha pa esaki. Merka ta boga pa pone fin na e kasi kuater aña di konflikto, i a bin ta intermediá for di yanüari den e dos buèlta di negosiashon entre esnan den guera.
“Durante di dos dia a realisá trabounan hopi difísil”, segun e bosero di Kremlin Dmitri Peskov na prensa ayera. Puntrá pa ki dia lo reanudá, Peskosv a bisa ku “awor aki no tin un fecha presis. Pero lo ta pronto”.
De e último buèlta, entre djárason i djaweps, Ukrania i Rusia a akordá nan promé interkambio di prezunan den vários luna, ounke ku segun Merka, ainda tin hopi trabou ku mester tuma lugá pa por yega na un akuerdo pa stòp ku e guera. E negosiashonnan ta e último esfuerso diplomátiko pa para e konflikto mas sangriento di Europa for di despues di Segunda Guera Mundial, ku algun shen mil morto, miónes di hende ku mester a hui for di nan kas i gran parti ost i zùit di Ukrania destruí.
