Dia 8 di febrüari por kuminsá ku Konstrukshon di stelazje i/òf stènt riba ruta di Karnaval

WILLEMSTAD.- Tur kliente di Prekario Karnaval 2020, tin pèrmit pa konstruí nan stelazje i /òf stènt riba 8 di febrüari 2020 despues di 10or di mainta. Tim di Prekario ta duna splikashon di tur e reglanan i rekisitonan ku mester tene kuenta kuné na momento di konstrukshon.

REGLANAN
Kòrda lesa e pèrmit di prekario karnaval i mantené na e reglanan stipulá. Mester tin e pèrmit òf kopia di e pèrmit tur momento. Mester pega e steker/ barcode na e konstrukshon. Haltura máksimo di e stelazje i/ òf stènt ta 4 meter. Haltura máksimo di flur ta 1 meter. Dak di e stelazje mester ta trahá poko schuin pa awa di áwaseru bai patras di e stelazje. Fundeshi i dak di e stelazje òf stènt mester ta bon sigurá. No ta permití pa konstruí nada nobo riba dia ku tin marcha.
No ta permití pa traha stelazje òf tènt pegá riba palu di lus, mester mantené un distansia mínimo di 5 cm. No ta permití pa tapa ningun bòrchi di tráfiko. Mantené na e meternan ku tin para den e pèrmit. Persona ku no registrá nan eksonerashon (‘ontheffing’) ta pèrdè nan prekario. No ta permití pa sera e pasashi pa peaton por pasa. Mester mantené 1 meter liber pa peaton por pasa dilanti stelazje, stènt i/òf tènt. Tènt pa bende produkto mester disponé di un flur  ku por wòrdu limpia fásil i mester tene kuenta ku seguridat. No ta permití pa spùit òf pinta ku fèrf riba propiedat di gobièrnu, por usa únikamente santu. No ta permití pa konstruí ku produktonan putrí òf daña. Tampoko pa usa stul òf banki bieu ku por trese bo seguridat na peliger.
Tim di Prekario ta traha duru pa ordená i manehá e parti aki di prekario karnaval. Di e forma aki, nos komunidat por disfrutá di Karnaval na un manera bon struktura. ROP ta boga tur kliente di Prekario pa mantené nan mes na tur regla i eksigensia eksistente.
Ofisina di Tim Prekario Karnaval 2020 ta alkansabel via e number na 462-2014 i 462-4015. Por bishitá e página di facebook Prekario Kòrsou.

SHARE

LEAVE A REPLY