WILLEMSTAD.- Un simpel dia di plaser ku no a haña ni chèns di kuminsá, ta terminá den un tragedia pa un famia di oriundo di Fuik. Esaki ta loke dos di e sobrebibientenan di e tragedia di djadumingu último riba laman a konkluí.
E grupo di famia i amigu ku tabata konsistí di e kapitan ku a fayesé, su pareha, su suegra, dos amigu i un dama ku ta pareha di un di e amigunan, a subi un boto di piskadó pa bai dal un keiru na punta di Kòrsou.
Juryleen “Jury” Lucia i su pareha Raylon “Tui” Dometillia a konta EXTRA kiko a pasa eksaktamente dia 16 di sèptèmber último riba laman.
Nan a konta ku den e grupo aki tabatin tres piskadó/landadó di hopi eksperensia i tambe tres persona ku no por landa. Nan a sali mas o ménos mitar di diesdos di mainta pa asina por bai pasa un dia di plaser kome, bebe i relahá kabes den área di laman di Fuik, pero na kaminda a opta bai Ostpùnt i pa einan topa ku un grupo di famia ku lo a topa nan for i riba tera pa e dia di plaser. E famia den pikòp tabata kore na tera sam sam ku e boto riba awa. Esnan na tera ta yega para un kaminda i asina warda e boto yega i nan tabata sigui.
Mas o ménos 1 ora i mei pa dos ora riba laman a yega na un punto kaminda e boto mester a lora pa drenta na un di e bokanan den e área di Ostpùnt.
Tabata den e maniobra aki ku algu a bai robes i olanan haltu a bòltu e boto ku tur e tripulantenan. Na momentu ku e boto a bòltu, mesora e kapitan a kue su pareha tene mirando ku e dama aki no por landa.
Un di e otro amigunan a kue e suegra tene dor ku e tampoko no por a landa miéntras ku nan a indiká na e otro amigu ku tampoko no por landa, pa e tene na e punta di e boto ku a keda riba awa.
Pues e kapitan, su amigu i un di e damanan ku ta pareha di e amigu so a bringa ku e tres otro tripulantenan debí ku ta nan tres so por landa.
Miéntras tantu e grupo di famianan ku tabata na tera, a mira e boto kabes abou pero no tabata mira ningun di e tripulantenan.
Mesora nan a bati alarma miéntras ku nan a purba yega un tiki mas serka di kosta pa asina wak kon por yuda e grupo.
Bringando e olanan grandi, e grupo aki a keda lucha sigur dos pa tres ora promé ku nan por a logra yega kantu di kosta.
Durante di e lucha, konstantemente e kapitan tabata purba tene su pareha riba awa. Despues di basta ratu e kapitan a grita su amigu pa tene su pareha pe. Mané e amigu a tene e pareha, nan no a mira e kapitan mas.
Unabes ku nan a yega kantu di kosta, ya kuater di e tripulantenan tabata hopi suak miéntras ku esun ku a keda tene na punta di e boto si tabata mihó di salú.
Despues di basta warda, outoridatnan a presentá. Mesora e grupo a risibí tratamentu na e sitio i finalmente tres a keda transportá ku urgensia pa departamento di emergensia na Poli pa tratamentu médiko avansá miéntras ku finalmente dos ta interná ainda debí na kantidat di awa ku nan a guli.
Despues ku outoridatnan a atendé ku e grupo di sinku ku a keda na bida, a kontinuá ku búskeda di e kapitan, pero sin e resultado deseá.
Despues ku outoridatnan a kanselá e búskeda pa kontinuá djaluna, famianan mes a opta pa bai buska yudansa di entre otro bushinan profeshonal.
Despues di esei famianan mes a subi laman bèk i a bin topa ku e kurpa ya sin bida.
Den nan emoshon famianan a saka e kurpa i bai kas ku e kurpa en espera di outoridatnan.
Kontando nan eksperensia amargo i lamentabel, Judy i Tui ku ta dos di esnan ku a keda na bida, a lamentá ku nan no tabatin nan faha di salbabida bistí.
Si esaki tabata e kaso, kisas kosnan lo por tabata otro mirando ku tabatin tres persona ku no por a landa den e grupo.
Loke e grupo aki a pasa aden lo keda grabá pa semper den nan kurason i te asta ta duda ku nan lo bolbe subi un boto atrobe.
