Diabétis; faktornan di rísiko i posibilidatnan di prevenshon

Awe tin pa públiko den kuadro di Benu Health Series e tema Diabétis ku botikario Rogier Larik ku lo bin papia i interkambiá ku tur esnan presente.  Den Benu ta Rogier ta e eksperto riba e tereno di diabétis. E ta spesialisá den diferente forma di diabétis i vooral e ròl di resistensia di insulina i estilo di bida. E ta estrechamente envolví den inisiativanan pa screen diabétikonan pa mehorá nan mes pa asina por detektá e malu aki den un  fase mas tempran pa asina por atendé. Manera Han Deelstra di Benu Pharmacy a bisa, esaki ta bira e di 6 seminario ku nan ta organisá den kuadro di Benu Health Series/seminarionan. Awe ta e dia di diabétikonan segun Han a bisa i p’esei e charla awe pa públiko. Ta un momentu korekto pa por atendé e tema aki. Benu ta forma parti di komunidat i ke duna bèk i p’esei ta trese e charlanan aki. I esaki den forma di duna informashon na hende i mehorá nan salú. I p’esei e Health Series e  bia aki ta riba diabétis. Ayera a duna informashon na profeshonalnan den e tereno i awe pa públiko. Nan ta kuminsá tuma inskripshon  pa 6.30 i pa asina 7 or e charla por kuminsá. Te ku awe den dia ainda tabatin algun lugá, ounke e sala ta basta yen.

Han Deelstra

 

Rogier Larik eksperto riba tereno di diabétis

 

El a splika ku el a profundisá riba e tema di diabétis siendo botikario i komo tal pa loke ta medisina e sa hopi. Pero el a bai muchu mas leu pa wak kiko ta diabétis i kiko e ta hasi den e kurpa i kon e diabétis ta surgi. I tur esaki tambe pasobra mundialmente e malu di suku ta kresiendo i e ta kana man na man ku sobrá peso segun Rogier Larik. Nan a bai wak kiko nan por nifiká pa e diabétiko. Nan sa hopi di remedi i a bai wak mas leu i den e charla ku el a duna ayera na e profeshonalnan el a toka e tema di kon e diabétis ta surgi pero promé ku e yega asina leu kiko por hasi i kiko por nifiká pa e pashènt.

 

Speransa….

 

Pa loke ta e charla ku Rogier Larik lo presentá awe pa e públiko, el a bisa ku di un forma mas simpel awe e lo splika kiko ta diabétis i e lo konta kon el a surgi i loke ta lógiko ta ku e kantidat di diabétis ta krese i e ta spera di por duna e speransa ku pa esun ku tin e diabétis por drei esaki bèk. Si kambia bo estilo di bida, por hasi e salú un poko mas mihó. I riba e punto ei Rogier lo pone énfasis durante di e charla ku e lo duna awe nochi.

Rogier Larik

 

Prevení diabétis

 

Hopi sa pero tòg nan ta keda puntra kon ta prevení diabétis. Rogier a splika ku di forma tempran, sigur for di serka muchanan kuminsá ku un bida salú. Kome salú, move sufisiente i e tin di aber na sosegá sufisiente anochi, no bebe alkohòl, no huma. Na Ulanda por ehèmpel a desaroyá programanan di estilo di bida pa un hende por kambia. Tin bia e ta poko difísil i e hende bou di guia por tuma e pasonan nesesario.

 

Diabétis tin komponentenan hereditario den dje segun Rogier pero e estilo di bida ta sòru ku pa esun ku por haña e diabétis di forma hereditario, e por lant’é.

 

Por kura….

 

I e diabétis aki por drei bèk siendo ku e malesa tei kaba. Remedi ta sòru pa e kehonan ku diabétis ta trese kuné, pa mehorá i baha esaki pero no ta e solushon pa diabétis. Pero ora kambia, adaptá estilo di bida por drei e diabétis bèk i kura di dje. Pero e ta bira difísil dependé kon largu e persona ta un diabétiko kaba.

Siendo e pashènt ku diabétis por haña diferente otro keho di salú. Por ehèmpel Rogier a menshoná problema ku wowo, nir, kurason, esei ta algun di e kehonan i ta netamente nan mester evitá. I por surgi komplikashonnan pa ku esakinan.

 

Suku den fruta….

 

Pa loke ta e pasonan pa evitá diabétis Rogier a rekomendá kome berdura. Kome mas berdura variá posibel. Fruta tambe ta bon pero máksimo 2 pa dia. Pasobra tin fruta ku suku den dje. I riba e punto aki el a bisa ku vooral frutanan tropikal tin hopi suku den nan. Pero tambe meskos ku ora ta primi e fruta pa saka e djus, e ta trese hopi suku kuné pasobra ta usa hopi fruta pa un glas di suku. I p’esei ta mihó usa e fruta den su forma original. I pa loke ta bibida Rogier a bisa ku den esaki tin hopi suku i p’esei mihó awa, te i kòfi i preferibel sin suku. Pa sierto hende e ta un kambio drástiko pasobra nan ta bebe hopi djus pa dia. Pero ta un paso, un kambio di mentalidat ku tin di kambia. I p’esei ta bon pa dal e pasonan chikí chikí te ora logra e kambio kompleto. I pa esun ku ta diabétiko kaba ta bon pa konsultá ku dòkter promé.

 

Move diariamente….

 

I pa loke ta e parti di moveshon Rogier ta rekomendá pa hasi por ehèmpel mei ora pa dia. E no ta bisa ku tin di bai un sentro di deporte pero ta importante pa hasi algu ku bo kurpa. Ta bon pa tur dia hasi algu i stimulá otro pa hasi algu na e kurpa.

 

Interkambio personal awe…

 

Awe por spera interkambio durante di e charla entre e públiko i Rogier. El a bisa di ta habrí pa preguntanan di tur esnan presente pasobra ta esei ta e intenshon i nan lo traha tempu pa atendé tur pregunta. E charla ta awe na Avila Beach Hotel i ta kuminsá 7 or di anochi. Inskripshon ta kuminsá for di mitar di 7.

 

 

 

SHARE

LEAVE A REPLY