LA HABANA, AP.- Miguel Diaz-Canel a kombertí den e presidente nobo di Cuba i e promé lider di e nashon karibense den kasi seis dékada ku no ta pertenesé na e famia Castro.
Den su promé diskurso, e ingeniero di 57 aña a primintí di kontinuá ku e revolushon sosialista establesé na 1959.
“Diaz-Canel a demostrá a lo largo di añanan ku e ta madurá, kapas di ehersé e trabou, su ideologia ta sólido i el a demostrá kompromiso i fidelidat na e revolushon”, asina Raul Castro a sigurá despues di terminá e seremonia.
Castro a informá ku e espektativanan ta ku e mandatario nobo ta kumpli ku e kargo durante dos periodo kontinuo i eventualmente e por remplas’é den e Partido Komunista kubano na aña 2021 na momentu ku Castro retirá di e puesto aki.
Diaz-Canel a wòrdu skohé pa 603 di 604 parlamentario den Asamblea Nashonal.
Raul Castro lo mantené kargo di sekretario di Partido Komunista ku el a tuma den Kongreso partidario di 2016.
Su salida di presidensia ta un momentu kargá ku simbolismo pa un pais ku a lo largo di dékadanan tabata goberná pa un generashon di guerieronan históriko liderá pa Castro.
