Fred Rutten a pidi retiro komo bondscoach di selekshon nashonal
WILLEMSTAD.- Federashon Futbòl Kòrsou (FFK) ta informá ku bondscoach Fred Rutten a disidí pa laga su funshon komo entrenador di nos selekshon nashonal di Kòrsou. Prensa na Hulanda ta meldu ku Dick Advocaat lo tuma di nobo e timon di selekshon di Kòrsou.
Den e último dianan tabatin hopi diskushon tokante e posishon di entrenador. Miembronan di selekshon a duna di konose ku nan ke bai Mundial ku Advocaat i no ku Fred Rutten. Presidente di FFK Gilbert Martina djabierne último a duna di konose ku lo no tin mas kambio. Pero awor ku Fred Rutten mes a disidí pa bai, e kaminda a bira liber pa Dick Advocaat.
FFK ta skirbi den un komunikado di prensa: “E desishon aki a ser tuma despues di kombersashon habrí i konstruktivo entre Fred Rutten i presidente di FFK, den kua semper e interes di futbòl di Kòrsou, nos hungadónan i e nesesidat pa trankilidat rònt di e selekshon nashonal tabata sentral.
Anke ku Fred Rutten mes no tabata tema di diskushon, el a disidí di retirá riba su mes. “No mester surgi un klima ku ta hasi daño na relashonnan profeshonal sano, tantu bou di hungadónan komo den e staf. P’esei ta prudente pa dal un paso atras. Ademas, tempu ta pèrta i Kòrsou mester sigui pa dilanti. Mi ta lamentá kon e situashon a desaroyá, pero mi ta deseá tur hende hopi éksito tambe,” Fred Rutten a bisa.
Fred Rutten a demonstrá klase ekstraordinario, profeshonalismo i sentido di responsabilidat den e situashon aki. For di su gran kompromiso ku futbòl di Kòrsou, el a skohe pa pone e interes mas grandi di nos ekipo i e trayekto pa e siguiente weganan importante, riba su propio interes.
FFK ta ekspresá su gran apresio pa e manera ku Fred Rutten a tuma e desishon difisil aki. Di e forma aki ela demonstrá liderato, integridat i rèspèt pa e interes nashonal di futbòl di Kòrsou.
FFK ta enfatisá tambe ku durante henter e proseso semper a aktua ku na forma kuidadoso, ku integridat i di akuerdo ku e kontratonan i prinsipionan vigente di bon gobernashon.
E federashon ta sigui komprometí pa fomentá stabilidat, profeshonalismo i transparensia den futbòl Kòrsou. Mehorashon di imágen ta unu di e 7 meta stratégiko di FFK pa e periodo di planifikashon 2025–2029.
Direktiva di FFK ta reuní awe pa deliberá tokante di e siguiente pasonan. For di awor, e enfoke di FFK ta kompletamente riba futuro, preservashon di trankilidat den i rònt di e selekshon, i sigui traha huntu riba e ambishonnan deportivo di Kòrsou. FFK ta hasi un yamada na tur persona envolví pa mustra responsabilidat, union i konfiansa durante e periodo aki den interes di e selekshon nashonal i futbòl di Kòrsou.
Mañan, entre 10:00 i 11:00 or di mainta, FFK lo tene un konferensia di prensa pa duna mas splikashon tokante e proseso for di febrüari 2026 te ku awe. Mañan, ainda e selekshon no lo ser presentá.”
