WILLEMSTAD.- Tin kantidat di hende ku ta dispuesto pa yuda pa amor pa patria. Nan no ta kobra. Esaki no ta kita ku na dado momento mester di ekspertonan ku mester paga pa p’e, pero hendenan ku ta liderá un proyekto grandi mester ta hendenan ku ta stima pais i ku tin dos plaka di sintí.
Hulanda a ofresé un man ku refineria, pero mesora a kuminsá papia yen kos di Hulanda sin buska drechi ta kiko nan ke yuda kuné. Apesar di esaki, David Dick ta konvensí ku te ainda Hulanda, inkluso Shell por duna un man kiko pa hasi ku refineria. “Hopi hende ta papia yen kos, pero mester pone emoshon i banda i no pleita.
Na su opinion mester pidi Hulanda por lo ménos konseho kon pa resolvé e problema i tin chèns ku e ta bai mas leu ku solamente konseho. “Buska un kòmbersashon sin ku ta akusá otro di nada”, Dick a trese dilanti den e podcast, 3’or ku Gino.
E ta bisa ku e sa ku esaki tabata posibel i tabatin apertura pa kombersá, pero semper a buska pleitu i strategianan pa bai korte. “E tipo di kosnan aki no ta yuda ku nada.” Dick ta konsehá pa buska poko hende ku no tin interes personal.
“Mi ta tuma nota ku kada bes ku tin negosashon ta tuma lugá e ta inisiá ku un grupo ku tin interes personal pa hasi negoshi. E interes mester ta Kòrsou.” Pa pone enfoke riba e situashon rondó di refineria e ta bisa ku tin ku wak kiko ta bai hasi awor ku e refineria: “Keda kuné òf elimin’é.”
Den kaso ku eliminá e refineria Dick ta konsehá pa no traha ku kompanianan chikí, pero traha ku kompanianan grandi ku por duna garantia di trabou i tin e kapasidat ku por limpia e tereno kompletu. “E mester ta un proyekto total i no kompanianan chikí ku ta bende heru bieu pa despues laga betòn i otro shushedat den suela atras. Ta un proyekto ku ta kosta hopi sèn i mester dil ku e kompanianan ku tin konosementu.”
Komo ehèmpel di konsekuensianan ku pais ta keda sintá kuné ora ku no no sinta i papia di forma rashonal i ophetivo. “Si wak e hospital nobo ku a traha a paga 440 mion di mas p’e sin ku tabata na nodi. Esaki ta pasobra no ta sinta na mesa i papia ku otro i tende.”
Segun Dick a pusha e proyekto di Hospital Nobo Otrobanda kaminda tabata muchu mas mihó si a traha huntu ku St. Elisabeth Hospitaal. “E lo a sali hopi mas barata.”
