MOSKU, RUSIA (AFP).- Un tribunal di Mòsku a kondená un hòmber na dies dia di detenshon pa motibu di a skirbi den sneu e slogan “Nò na guera”, e último ehèmpel di intensifikashon di represhon na Rusia for di despues di inisio dje guera kontra di Ukrania.

Dmitri Federov a keda sorprendé pa polis ora ku e tabata skirbi e lema ku un dede den e sneu di e popular parke Gorki dje kapital ruso, segun un informe di 24 di novèmber pero ku a bira konosí ayera.

“E agentenan a bis’é pa bai ku nan na e Ministerio di Interior i, pa motibu ku el a nenga, nan a atvertié ku el a violá lei i a pasa na su detenshon”, segun e reportahe.

Federov a nenga den korte ku el a resistí e aresto, pero a atmití di a skirbi e teksto i a keda kondená na dies dia di detenshon atministrativo. E represhon kontra di esnan ku ta kritiká gobièrnu a bin ta tuma lugá pa añanan kaba na Rusia, pero a intensifiká for di komienso dje ofensivo militar ruso na Ukrania, den febrüari di 2022.

E mayoria di esnan ku ta kontra dje polítika di presidente Vladimir Putin, sea ta den prizòn òf den eksilio. Míles di ruso sin ningun previo aviso tambe a keda husgá, i algun kondená ku kastigu pisá, pa motibu ku públikamente nan a bisa di ta kontra dje ofensiva militar na Ukrania.

Segun e ONG ruso OVD-Info, alrededor di 20.000 persona a keda detené den poko ménos di dos aña pa motibu di a ekspresá nan mes kontra dje guera.

LAGA UN KOMENTARIO

Please enter your comment!
Please enter your name here