Situashon ta sigui tenso den prizònnan na Ecuador, ku matansa na gran eskala.
QUITO, Ecuador (AFP).- Diestres prezu a muri djadumingu den un prizòn den zùitwèst di Ecuador ku tabata esenario di matansanan resien i a suma 44 morto den kasi un luna, segun e organismo estatal a kargo di prizònnan (SNAI). E mortonan, di kua e kousanan ta keda investigá, a kai den un prizòn dje siudat di Machala, serka di frontera ku Perú. “Ta hasiendo e outopsianan i prosedimentunan di rutina pa determiná e kousanan ofisial”, segun e entidat den un mensahe mandá na periodistanan.
SNAI a indiká ku a deskubrí e kurpanan djadumingu durante di un inspekshon di polis despues di un “detonashon di un artefakto eksplosivo pafó” di e prizòn. Segun medionan lokal, e mortonan a kai dor di stekmentu i eksploshon na komo 100 meter dje instalashon realisá pa un dron kargá ku eksplosivonan usá pa distraé esnan uniformá.
Den mesun prizòn kasi un luna pasá a asesiná 31 prezu, vários dor di stekmentu, miéntras ku na final di sèptèmber otro atake entre prezunan a kousa 14 morto, inkluso di un guardia di prizòn. Masakrenan ta frekuente den prizònnan di Ecuador, ku den último añanan a konbertí den sentronan di operashon i di enfrentamentu entre gruponan di narkotráfiko.
Segun un informe resien di Komishon Interamerikano di Derechinan Humano (CIDH), por lo ménos 663 prezu a muri den “susesonan violento” den prizònnan dje pais kuminsando den 2020.
Masakrenan i enfrentamentunan armá den barionan i espasionan públiko ta algu di tur dia den e pais ku lo sera aña ku un rèkert di 52 asesinato pa kada 100.000 habitante, segun proyekshon di Opservatorio di Krímen Organisá. Ecuador a bira un protagonista den trafikashon internashonal di droga pa su ubikashon stratégiko, haf pa salida di kokaina kolombiano i peruano ku ta keda bendé na Merka i Europa.
